Qeveria Kurti III është një ndër kabinetet më të mëdha në Ballkanin Perëndimor dhe sa Kina, tha shefi i Grupit Parlamentar të Aleancës për Ardhmërinë e Kosovës, Besnik Tahiri.
Ai në konferencë për media të mërkurën kritikoi kryeministrin Albin Kurti, siç tha për numrin e madh të ministrave dhe këshilltarëve politikë.
“Po flasim për madhësinë e qeverisë e cila përshkruan një qeveri dhe ministra fiktivë. Akomodim të partisë në pushtet në qeveri. Me një kabinet i cili është një ndër më të mëdhenjtë në Ballkanin Perëndimor dhe në krahasim me numrin e popullatës është më i madh sesa i Kinës, Indisë dhe Pakistanit”, tha ai.
Sipas tij, qeveria përmes rregullores së miratuar ka emëruar politikisht 453 persona.
“Kryeministri ka deri 49 këshilltarë dhe staf. A jeni duke kuptuar, janë 50 njerëz duke përfshirë këshilltarë politikë, këshilltarë të jashtëm, 15 staf të emëruar politik të cilët emërohen prej partisë. A ju kujtohet çka thoshte? Kryeministri s’ka nevojë për shumë këshilltarë… Kjo qeveri i ka 453 njerëz që mundet me i emëruar politikisht. Nuk po e thotë Besnik Tahiri, por rregullorja 04-2026 e cila përbën madhësinë më të madhe të kabineteve politike që e ka dikush”, shtoi Tahiri.
Kritika ndaj qeverisë Kurti adresoi edhe deputetja tjetër e AAK-së, Albana Bytyqi, siç tha për mungesën e grave ministre.
“Kemi një kabinet më diskriminues pasi nga 21 anëtarë sot i kemi vetëm katër gra ministre. Deri dje në fushata kanë folur për të drejtat e grave e sot i kemi vetëm 4 gra ministre. Kemi më pak se 20 për qind të kabinetit qeveritar. Andaj kërkoj nga qeveria që të respektohet barazia gjinore”, theksoi Bytyqi.
Shefi i deputetëve të AAK-së u pyet edhe për mundësitë e zgjedhjeve të reja, teksa u shpreh i bindur se partia e Ramush Haradinajt do të ketë rezultat pozitiv.
“Zgjedhjet nuk janë produkt i veprimit politik të AAK-së. Në fakt ne kemi qenë të anashkaluar në këtë temë. Ajo çka mund të them me përgjegjësi të plotë është se kurdo që të vijnë zgjedhjet, AAK-ja do të ketë rezultat më të mirë. Kosovës nuk i duhen zgjedhjet, por është kryeneçësia e këtij kryeministri që na ka pruar në këtë situatë që deshi të marrë edhe pozicionin e presidentit”, deklaroi Tahiri
