Një pensionist zviceran ka mbështetur për vite me radhë një grua kosovare, e cila pretendonte se shpesh ndodhej në vështirësi, duke i dhënë huamarrje – deri sa ai humbi mbi 1.1 milion euro, raporton NZZ.ch. Gruaja është dënuar nga Gjykata Rajonale e Bülach për mashtrim profesional të përsëritur.
Sipas medies zvicerane, e dënuara është një grua kosovare 64-vjeçare. Sipas mediave, nuk është sqaruar me saktësi sa kohë jeton në Zvicër. Ajo ka tre fëmijë të rritur dhe gjashtë nipër e mbesa. Megjithatë, ndaj saj është caktuar një vendim dëbimi nga Zvicra për shtatë vjet.
Pensionisti, në fund të 70-ave, ka ndjekur procesin si privatklagjës. Ata janë njohur që në vitin 2001 dhe kanë zhvilluar një marrëdhënie miqësore me besim reciprok. Në vitin 2011, gruaja ka drejtuar një restorant që nuk funksionoi mirë, dhe ky ishte momenti i huamarrjes së parë prej 30,000 frangash zvicerane.
Gjatë viteve, kosovarja i kërkoi herë pas here para pensionistit, duke përmendur pasuri në Kosovë dhe situata të ndryshme emergjente, përfshirë divorc, garanci për arrestime të pretenduara, borxhe tatimore ose shpenzime spitalore pas aksidenteve. Pensionisti madje udhëtoi disa herë personalisht në Sarajevë për t’i dorëzuar paratë.
Midis viteve 2012 dhe 2016, ajo mori rreth 1.1 milion euro. Pensionisti u shkatërrua financiarisht dhe kërkoi ndihmë edhe nga vëllai i tij.
Në mars 2024, pas një pauze të gjatë, gruaja kërkoi sërish para dhe u arrestua në flagrancë gjatë dorëzimit të parave. Prokuroria e akuzoi për mashtrim profesional të përsëritur dhe shantazh, duke kërkuar pesë vjet burg dhe dhjetë vjet dëbim.
Gjykata Rajonale e Bülach e ka dënuar 64-vjeçaren me 30 muaj burg, prej të cilëve 9 muaj plotësohen menjëherë dhe 21 muaj pezullohen me kusht. Ajo do të dëbohet për shtatë vjet, ndërsa kërkesa për dëmshpërblim të pensionistit është pranuar.
Sipas mediave, kryetari i gjykatës theksoi se e dënuara ka mohuar akuzat në mënyrë të thjeshtë dhe stereotipe, ndërsa viktima dhe vëllai i tij dhanë dëshmi të qarta. E dënuara ka vepruar në mënyrë të sofistikuar, duke ushtruar presion herë pas here, dhe viktima përfundoi duke humbur kursimet e saj për pensionin.
