Blerjet i bën pothuajse për çdo javë.
Por, për produktet që bleu këtë muaj për iftar, ky qytetar thotë se pagoi më shumë së herë të tjera.
Çmimet e ushqimit, sipas tij, janë rritur ndjeshëm gjatë muajit të Ramazanit.
“Çmimet, çmimet në treg janë katastrofë. Pse? Në të gjithë botën, çdo shtet për festat fetare të veta i zbresin çmimet. Zbritje reale, kurse te ne diku minimumi rreth 30%, minimumi 30% janë rritur çmimet në çdo produkt ushqimor. Çdo produkt”, u deklarua qytetari.
Rritjet e çmimeve në “Tregun e Gjelbër” në kryeqytet, po i shohin të papërballueshme edhe qytetarë të tjerë.
“… një pjesë e popullatës, mos të them shumica e popullatës, është një kërkesë e madhe, çka po ndodh praktikisht kur do duhej për muajin e rahmetit me ndodh e kundërta, me pas zbritje çmimesh, te ne shkon e kundërta, rritje e çmimeve”, tha një tjetër qytetar.
“Veç çka sa i kanë çuar përpjetë, veç çka i kanë hypë. Uhuu, për kërkënd nuk është e mirë. Kush po mundet me u përballu, shumë shtrenjtë, shumë shtrenjtë”, u shpreh ai.
Por me këtë nuk po pajtohen vetë tregtarët.
“Këto sendet në këtë treg këtu, janë sendet, prodhime si do të Kosovës, nuk janë duke u ngrit. Ato çka po vijnë prej jashtë munden me u ngrit deri 50 cent. Në përgjithësi çmimet nuk janë ngrit. Ndoshta në ndonjë treg tjetër mundet me pasn gritje, këtu te ne nuk… unë me sa di, jo shumë. Ka tash me 20 cent, 30 cent këndej e andej, nuk çon shumë peshë”, tregoi tregtari Idriz Hajdari.
Ndërkohë, përfaqësuesi i Shoqatës së konsumatorëve thotë se qytetarët jo vetëm që përballen me rritje çmimesh, por edhe me mungesë të mbrojtjes institucionale.
“Ne si qytetarë konsumatorë jemi taksapagues, sepse çdo gjë që blejmë brenda produktit, brenda çmimit është taksa, tatimi është taksiza. Si të tillë ne jemi gjenerues kryesorë të buxhetit konsumues të shtetit. Domethënë ne paguajmë me avans, me parapagim e paguajmë shtetin që të kujdeset për ne.A ndodh kjo? Me gjithë këto ankesa po duket se nuk po ndodh. Pse po ndodh? Ja formula ime: Unë them, nëse dikush nuk di, nuk do ose nuk mund ta zgjidhë një problem për një kohë të gjatë, domethënë është pjesë e problemit. Edhe me këtë rast po duket se Qeveria dhe MINT- me departamentin e mbrojtjes së konsumatorit, me inspektorat e me gjithë mekanizmat tjerë janë pjesë e problemit”, tha Selatin Kaçaniku.
Sipas të dhënave nga Agjencia e Statistikave të Kosovës, indeksi i tërësishëm i çmimeve të konsumit në muajin shkurt të vitit 2026 është rritur për 0.6 për qind krahasuar me muajin janar.
