Gjykata Themelore në Prizren ka vendosur masën e paraburgimit prej një muaji ndaj dy të dyshuarve, E.K. dhe A.K., të cilët po hetohen për veprat penale “Fajdeja” dhe “Detyrimi”.
Sipas vendimit të gjykatës, paraburgimi i tyre mund të zgjasë deri më 11 prill.
Sipas të dhënave nga hetimet paraprake, i dyshuari E.K. që nga viti 2021 dyshohet se ka shfrytëzuar gjendjen e vështirë financiare të viktimës B.Ç., duke i dhënë para me kamata shumë të larta. Nga kjo veprimtari dyshohet se ai ka përfituar më shumë se 400 mijë euro.
Në përpjekje për të shlyer borxhin, në këtë rast është përfshirë edhe viktima tjetër, B.B., i cili kishte marrë para nga të pandehurit për ta ndihmuar viktimën e parë.
Hetimet tregojnë se dy të dyshuarit kanë kërkuar nga viktimat një shumë totale prej rreth 550 mijë eurosh. Përveç kësaj, ata dyshohet se kanë kërkuar edhe transferimin e pronësisë së dy lokaleve afariste dhe një shtëpie, me vlerë të përgjithshme rreth 1 milion euro, si mënyrë për shlyerjen e borxhit.
Përveç presionit financiar, sipas hetimeve, të pandehurit kanë përdorur edhe dhunë fizike dhe kërcënime. Ata dyshohet se e kanë detyruar viktimën B.Ç. dhe nënën e tij të paraqiten në zyrën e një përmbaruesi privat për të vazhduar procedurat noteriale për bartjen e pronës.
