Gjithçka duket qetë tani.
Por kjo qetësi nuk ishte edhe mbrëmë pas mesnate.
Zhurma e një mjeti shpërthyes bëri jehonë të madhe, derisa u gjuajt në shtëpinë e një gruaje këtu në fshatin Sfeqël të Podujevës.
Atë dyshohet se e hodhën persona të panjohur.
Familja e cila dyshohet që u sulmua nuk pranoi që të flas për televizionin. Mirëpo fqinjët e tyre thanë se zhurma e mjetit shpërthyes u dëgjua disa metra larg
Por si rrodhi e gjithë ngjarja?
“Ka gjuajtur dikush edhe u ik, pastaj kanë ardhur policia dhe më nuk di asgjë. Çdo natë kam dal përjashta, mbrëmë nuk kam dal. Kanë gjuajtur i kam dëgjuar. E kam pa qat dritë kish po veton, dhe kur jam zgjuar në mëngjes më ka treguar ky kojshia këtu. Pas 12 besoj qashtu ka ndodhur dhe në mëngjes i kam parë policinë”, shprehet Bajram Halili.
Për rastin u njoftua edhe Policia e Kosovës.
“Është raportuar se persona të panjohur kanë hedhur mjet shpërthyes në shtëpinë e viktimës femër kosovare. Në vendin e ngjarjes kanë dalë njësitë përkatëse policore. Lidhur me rastin është njoftuar prokurori”, ka njoftuar policia.
Me t’u njoftuar nga Policia, Prokuroria Themelore e Prishtinës konfirmoi nisjen e hetimeve.
“Pas pranimit të informatës nga Policia e Kosovës, Prokurori i Shtetit ka inicuar rastin si vepër penale ‘Përdorimi i armës apo mjetit të rrezikshëm’, sipas nenit 367 të KPRK-së. Në këtë drejtim, Prokurori i Shtetit, në bashkëpunim të plotë me Policinë e Kosovës, është duke ndërmarrë të gjitha veprimet e nevojshme hetimore për zbardhjen e plotë të kësaj çështjeje”, thuhet nga prokuroria.
Sipas raportit të Policisë, cak i sulmit këtë të mërkurë ishte edhe lokali i disa grave në Prishtinë, i cili u përfshi nga zjarri.
I njëjti dyshohet se u krye në mënyrë të qëllimshme.
