Shefja e Grupit Parlamentar të LDK-së, Jehona Lushaku-Sadriu ka thënë se propozimi i miratimit të amendamenteve kushtetuese për zgjedhjen e presidentit, nuk është mënyra e duhur.
Ajo ka thënë se LDK ka përkrahur këto amendamente, por kjo mënyrë nuk i kontribuon demokracisë.
“Amendamentet kanë qenë të përkrahura në thelb prej LDK-së dhe qëndrimin do ta japim edhe në seancë, por mënyra se si këto janë proceduar, nuk është mënyra më e mirë e mundshme, që i kontribuon demokracisë së vendit tonë”, tha ajo.
Lushaku-Sadriu ka thënë se reformat kushtetuese kërkojnë kohë dhe nuk mund të behen me urgjencë.
“Reformat kushtetuese kërkojnë kohë, kërkojnë analizë dhe kërkojnë mirëfilli që të pozicionohemi në dobi të funksionalitetit tonë dhe jo me urgjencë të procedojmë me amendamentet për të cilat nuk kemi as minimumin e kohës për të diskutuar”, tha Lushaku.
Komisioni për Legjislacion ka miratuar me 6 vota për dhe dy kundër amendamentet e propozuar presidentja Vjosa Osmani që presidenti të zgjedhet direkt nga populli.
