Kampionia e Kosovës në futboll, Drita, ka një mision të qartë para vetes për ndeshjen e kthimit kundër Celjes në kuadër të fazës “play-off” të Ligës së Konferencës.
Drita synon përmbysjen e rezultatit nga ndeshja e parë dhe kualifikimin në 1/8 e finales të kësaj gare të UEFA-s.
Celje triumfoi javën e shkuar 3:2 në Prishtinë, ndërsa tani Drita kërkon hakmarrjen në Slloveni për të vazhduar ta shkruajë lavdinë e historinë evropiane.
Dueli i kthimit ndërmjet Celjes dhe Dritës, luhet sot prej orës 18:45 kurse te skuadra nga Kosova të gjithë janë të përgatitur dhe motivuar maksimalisht.
Madje, trajneri Zekirija Ramadani ka insistuar se rezultati i ndeshjes së parë mund të jetë i kthyeshëm kurse ka shtuar se Drita do të luajë për të shënuar gola.
Gjithashtu, te Drita presin përkrahje të madhe edhe nga tribunat pasi kanë premtuar se do të luftojnë deri në fund të ndeshjes për fitore dhe eliminim të kundërshtarit.
Drita është skuadra e parë nga Kosova që siguroi paraqitjen në fazën e plejofit dhe tani ka synim të kalojë në 1/8 e finales në Ligën e Konferencës, duke shkruar kapitull të ri.
