Kombëtarja e Kosovës në basketboll, të hënën ka nisur grumbullimin para ndeshjes me Sllovakinë, për të cilën tashmë selektori Bujar Loci ka publikuar listën e zgjeruar.
“Dardanët” grumbullimin do ta mbajnë në Prizren, ku edhe do të zhvillohet ndeshja me Sllovakinë, ndërsa do të stërviten nga dy herë në ditë.
Dueli që luhet të premten nga ora 19:00 në palestrën “Sezai Surroi” i takon xhiros së dytë të parakualifikimeve për “EuroBasket 2029”, ku si Kosova ashtu edhe Sllovakia kanë nga një fitore.
Kosova në këtë përballje do të jetë pa Dardan Berishën e Drilon Hajrizin, ndërsa është ftuar amerikani i natyralizuar Divine Myles.
FBK-ja, ka bërë të ditur se biletat e ndeshjes kanë dalë në shitje dhe çmimi i biletës është 5 euro.
