Në Gjykatën Themelore në Prishtinë sot mbahet seanca e radhës në gjykimin për shpërthimin në kanalin e Ibër-Lepencit, në Varagë të Zubin-Potokut.
Seanca është caktuar pasi kryeprokurori i Prokurorisë Speciale të Kosovës, Blerim Isufaj, ka refuzuar kërkesën e mbrojtjes për përjashtimin e prokurorit special Bekim Kodraliu nga kjo lëndë.
Në këtë rast, për sulmin në kanalin e Ibër-Lepencit akuzohen dy vëllezërit Dragisha Viqentijeviq dhe Jovan Viqentijeviq, si dhe Igor Dimoviq.
Në seancën fillestare të mbajtur më 24 dhjetor 2025, mbrojtësi i të akuzuarit Jovan Viqentijeviq, avokati Nebojsha Vllajiq, kishte kërkuar përjashtimin e prokurorit Kodraliu. Kërkesën e tij e kishin përkrahur edhe mbrojtësit e dy të akuzuarve të tjerë.
Për këtë arsye, ajo seancë ishte ndërprerë.
Prokuroria Speciale, aktakuzën ndaj të dyshuarve e ka ngritur më 9 dhjetor 2025.
