Prokuroria Themelore në Gjilan ka bërë të ditur se motive për vrasjen që ndodhi mbrëmë në fshatin Pogragjë të Gjilanit deri tash janë të pa njohura.
Sipas Prokurorisë, i dyshuari për këtë rast i cili ndodhet në arrati nuk ka pasur të kaluar kriminale, ashtu sikurse 29-vjeçari që mbeti i vrarë.
Bëhet e ditur se në vend ngjarje janë sekuestruar 3 pushkë gjuetie me leje – afat të skaduar
“Në vendin e ngjarjes kanë marrë pjesë të gjitha ekipet relevante Policore, si dhe Prokurori i Shtetit, ku janë ndërmarrë të gjitha veprimet e nevojshme, me qëllim të zbardhjes së rastit. Gjithashtu, është kryer kontrolli i shtëpisë së të dyshuarit R.A, ku gjatë kontrollit dhe ekzaminimit të vendit të ngjarjes janë sekuestruar 3 (tri) pushkë gjuetie me leje – afat të skaduar. I dyshuari, pas kryerjes së veprës penale është larguar nga vendi ngjarjes dhe i njëjti gjendet në arrati. Prokurori i shtetit, ka lëshuar Urdhëresën për Autopsi të trupit të pajetë të viktimës. I dyshuari dhe viktima, nuk kanë të kaluar kriminale dhe nuk kanë pasur ndonjë rast të raportuar për Dhunë në Familje”, thuhet nga Prokuroria Themelore e Gjilanit./teve1.info/
