Mandatari për formimin e Qeverisë së re, Albin Kurti, ka nisur fjalimin e tij të ekspozesë para deputetëve të legjislaturës së dhjetë duke bërë referencë në procesin gjyqësor në Hagë ndaj ish-krerëve të Ushtrisë Çlirimtare të Kosovës (UÇK).
Kurti ka thënë se propozimi i Zyrës së Prokurorit të Specializuar për dënim të ish-krerëve të UÇK-së me nga 45 vjet burgim bie ndesh me të vërtetën dhe mohon kontekstin historik e politik të luftës sonë çlirimtare.
“Po mbajmë këto dy seanca pasditen e sotme për shkak të zhvillimeve të fundit në procesin gjyqësor ndaj drejtuesve të UÇK-së – Hashim Thaçi, Kadri Veseli, Jakup Krasniqi dhe Rexhep Selimi. Kërkesa e prokurorisë për dënim prej 45 vitesh për secilin prej tyre, përfshirë pretendimet për krime kundër njerëzimit, është një orvatje që bie ndesh me të vërtetën dhe mohon kontekstin historik e politik të luftës sonë çlirimtare”, ka deklaruar Kurti.
Ai ka shtuar se qëndrimi i Qeverisë së Republikës që ai drejton mbetet i qartë: “Në Kosovë janë kryer krime kundër njerëzimit ndaj popullatës civile shqiptare, të cilat i ka kryer regjimi i Jugosllavisë së Serbisë nën Millosheviçin. Ky fakt është i dokumentuar dhe i njohur ndërkombëtarisht. Barazimi mes drejtuesve të UÇK-së dhe një regjimi gjenocidal është i paqëndrueshëm dhe shtrembërim faktik dhe historik. Për familjet e viktimave, kjo është e padurueshme dhe e papranueshme.”/teve1.info/
