Ishte ora dhjetë e mbrëmjes.
Gjithçka ishte në qetësinë e saj deri në një moment kur vendi pësoi një dridhje tërmeti.
Shkalla e saj prej 4.6 ballë u dëgjua pothuajse në të gjitha komunat.
Lëkundjet u ndjenë edhe në studion e tëvë1.
E në disa lagje, shumë qytetarë edhe dolën nga banesat e tyre.
Ndonëse tërmeti u ndje dukshëm në mbarë vendin, epiqendra e tij ishte 23 km në lindje të Prizrenit.
Të tillë tërmet, prizrenasit thonë se nuk e mbajnë mend të ketë ndodhur.
“Fëmija u trazuan pak një vajzë e vogël filloi të qante, thash mos u tutni se tërmet. Në 2011 apo në 2012 ka qenë pak një dridhje e vogël po si ky nuk mbaj mend. Isha shtritë në shtrat kur e dallova që filloi të dridhej shtrati, u zgjova kisha pak panik, i zgjova edhe anëtarët e familjes, por tani më nuk ka pasur tutje”, tha qytetari Ibrahim Bytyqi.
E dikush tjetër, në atë kohë ishte duke punuar.
“Isha duke punuar në kompjuter, ishte një dridhje që është dalluar mirë. Tavolina filloi të lëvizë edhe karrige, por ishte shumë e shkurtër nuk më shqetësoi fare hiç e kam marr si gjë normale”, tregon Berat Bahtiu.
Nga Shërbimi Gjeologjik i Kosovës kanë njoftuar se sizmiciteti i këtij tërmeti kishte potencialin të rrezikojë qytetarët dhe shkaktojë ndonjë dëm material për shkak të forcës së lartë.
Por nga Komuna e Prizrenit thanë për televizionin se qytetarët nuk kanë nevojë të panikosen.
Ndonëse treguan se deri tani, nuk kanë marrë asnjë thirrje nga ta për dëme.
“Tërmeti u kanë në mbrëmje ka ora dhjetë e diçka minuta, ai ishte i fuqishëm 4.9 ka kapluar rajonin e Prizrenit në disa sekonda. Ne, në bashkëpunim me policinë dhe në koordinim me FSK-në deri tash nuk kemi ankesa nga qytetarët për diçka dëme. Panik ka te qytetarët, ne jemi këtu më çdo koordinim mos bëni panik, tërmetet çdo epiqendër kanë këtu”, tha Sead Arifi- drejtor i emergjencave në Komunën e Prizrenit.
Ndërkaq, gjatë ditës Ministria e Mjedisit, Planifikimit Hapësinor dhe Infrastrukturës ka udhëzuar qytetarët se si të veprojnë në raste kur ndodh një tërmet.
Sipas këtij dikasteri, rekomandohet që të ruhet qetësia dhe gjithashtu të qëndrohet larg ndërtesave, shtyllave elektrike dhe pemëve.
