Është ora 8 e mëngjesit.
Mësimdhënësit e shkollës “Pavarësia” si zakonisht u takuan në sallën e arsimtarëve.
Por nga këtu të martën ditarët nuk i morën për t’iu drejtuar klasave.
Kjo meqë vendosën ta mbajnë një protestë, duke i bojkotuar dy orët e para mësimore.
Krejt kjo, pasi kolegu i tyre mësimdhënës, u arrestua të hënën.
Deri tek rasti, erdhi pas publikimit të një video, ku ky mësues shihet duke u përleshur me një nxënës.
Mësimdhënësit, po kërkojnë një ambient të sigurt e orë mësimore që mbahen normalisht.
“Kjo grevë nuk organizohet për të justifikuar dhunën dhe as për të mbrojtur atë. Përkundrazi ajo është një reagim kundër dhunës dhe kundër veprime delikuente që po cenojnë sigurinë dhe dinjitetin e mësimdhënësit në procesin edukativo-arsimor. Qëllimi ynë është të mbrojnë një ambient të sigurt dhe profesional ku mësimi zhvillohet normalisht dhe ku autoriteti i mësimdhënësit nuk vihet në pikëpyetje përmes fyerjeve, ofendimeve, sharjeve dhe nënçmimit”, tha Ardit Ukaj – përfaqësues sindikal i shkollës.
Në mbështetje të mësimdhënësve të martën këtu, u panë edhe përfaqësues nga SBASHK.
Këta thanë se video e publikuar, nuk është e plotë.
Kërkojmë nga organet e drejtësisë që sa më shpejt, urgjentisht ta shqyrtojnë rastin, të dalin me të vërtetën dhe ta lirojnë arsimtarin, të marrin masa ndaj prindërve të nxënësve të cilët përdorin dhunë në shkollë. Përndryshe, na jena në përkrahje të mësimdhënësve të kësaj shkolle. Shkollat tjera, disa janë solidarizua me një orë mësim, me një orë ndërprerje të mësimit me këtë shkollë. Nëse ngjarjet nuk sqarohen shpejt dhe nuk lirohet mësimdhënësi, mund të që nga dita e nesërme mund të përshkallëzohet kjo formë e veprimit sindikal”, tha Ymer Ymeri nga SBASHK.
Me kolegët u solidarizuan edhe nga shkolla fillore e mesme e ultë “Ismail Qemali”.
“Mbrëmë kolektivi jonë i cili është shumë i madh, me 3 mijë nxënës dhe me 130 arsimtarë, kanë komunikuar në grupin e shkollës vazhdimisht. Jemi ardh te një përfundim që t’i përkrahim dhe ju kemi përkrahur në orën e parë ju thashë edhe fillim, edhe pe përsëris. Aq sa e kemi pasur arsyeshme në bazë të udhëzimeve dhe rregullave shkollore, sepse duhet të njoftohet Këshilli i Shkollës. Pajtona me sekretarin e SBASHK-ut i cili tha do të vazhdojmë me masa të tjera nëse padrejtësisht arsimtari rri në paraburgim. Shumë e lehtë me paraburgos arsimtarin, në minutë”, tha Naim Bytyqi, përfaqësues i shkollës Ismail Qemajli.
E për këtë rast nga Drejtoria Komunale e Arsimit në Prishtinë, thonë se janë në pritje të një raporti nga drejtoria e shkollës ku ndodhi rasti.
“Ajo se çfarë bie në kompetencat tona si DKA është që të njëjtin rast të sjelljes së mësimdhënësit të kalojmë në komision disiplinore. Ky është një organ serioz që trajton me detaje ato rrethana që kanë dërguar në atë sjellje sepse qëllimi i komisionit disiplinorë është edhe gjetja e faktorëve që të mos përsëriten rastet e tilla në të ardhmen. Po e presim një raport nga shkolla të cilët besoj që sot duhet të marrim nga drejtori i shkollës me detaje”, tha Sami Shahini drejtor i DKA-së në Prishtinë.
Ndërsa, nga Prokuroria Themelore në Prishtinë në një përgjigje për tëvë1, thonë se mësimdhënësi tashmë është ndaluar për 48orë, kurse me nxënësin po merren nga Departamenti për të Mitur.
“Me urdhër te Prokurorit kujdestar nga Departamenti i Përgjithshëm është ndaluar i dyshuari ne ketë rast Arsimtari ne kohëzgjatje prej 48 orëve për veprën penale “ Keqtrajtimi gjate ushtrimit te detyrës zyrtare apo autorizimeve publike” sipas nenit 195 te Kodit Penal te Republikës se Kosovës. Prokurori kompetent i shtetit se bashku me organet e tjera relevante janë duke i ndërmarre te gjitha masat dhe veprimet e nevojshme hetimore konform dispozitave ligjore ne fuqi. Sa i përket per nxënësin Prokurori nga Departamenti për te Mitur është njoftuar dhe janë ne fazën preliminare te hetimeve te kësaj çështje penale”, thuhet nga Prokuroria.
Ndërkohë, mësimi në këtë shkollë vazhdoi rregullisht nga ora e trete mësimore.
