Kabineti i sigurisë i Izraelit miratoi të dielën masa që synojnë thellimin e kontrollit izraelit mbi Bregun Perëndimor të pushtuar dhe dobësimin e fuqive tashmë të kufizuara të Autoritetit Palestinez.
Zyra e Ministrit të Financave të ekstremit të djathtë, Bezalel Smotrich, në një deklaratë njoftoi vendimet që do ta bënin më të lehtë për kolonët hebrenj që t’i detyronin palestinezët të hiqnin dorë nga toka, duke shtuar se “ne do të vazhdojmë ta varrosim idenë e një shteti palestinez”, citon AP.
Yonatan Mizrachi, një studiues në grupin mbikëqyrës izraelit kundër vendbanimeve Peace Now, e quajti vendimin “shumë domethënës”. Ai tha se vendimi ende kërkon miratimin e komandantit më të lartë të Izraelit për Bregun Perëndimor.
Presidenti palestinez Mahmoud Abbas në një deklaratë e quajti vendimin “të rrezikshëm” dhe një “përpjekje të hapur izraelite për të legalizuar zgjerimin e vendbanimeve” dhe konfiskimin e tokës. Ai bëri thirrje që Shtetet e Bashkuara dhe Këshilli i Sigurimit i OKB-së të ndërhyjnë menjëherë.
Vendimi u njoftua disa ditë përpara se kryeministri izraelit Benjamin Netanyahu të takohet me presidentin amerikan Donald Trump në Uashington.
Në dhjetor, Kabineti i Izraelit miratoi një propozim për 19 vendbanime të reja hebraike në Bregun Perëndimor, ndërsa qeveria vazhdon me një mori ndërtimesh që kërcënojnë më tej mundësinë e një shteti palestinez.
Izraeli gjithashtu ka kapërcyer pengesën e fundit përpara fillimit të ndërtimit të një projekti të diskutueshëm vendbanimesh pranë Jerusalemit, i cili në fakt do ta ndante Bregun Perëndimor në dy pjesë , sipas një tenderi qeveritar të raportuar në janar.
