Ministri në detyrë i Mbrojtjes, Ejup Maqedonci, ka vlerësuar se pozicioni i Kosovës, si në aspektin politik ashtu edhe në atë të sistemit të mbrojtjes, është më i avancuar se shumë vende të Evropës Lindore që tashmë janë pjesë e NATO-s.
Maqedonci në emisionin “Këndi i Debatit” përmendi që pengesë për anëtarësim është hezitimi i vendeve mosnjohëse për mbështetjen e Kosovës.
“Pozicioni i Kosovës së tanishme, si në aspektin e saj politik, si në aspektin e qeverisjes, gjithashtu edhe në atë se si po e ndërtojmë sistemin tonë të mbrojtjes dhe ku jemi me ushtrinë tonë është ndoshta edhe më mirë se pozicioni i shumë vendeve të Evropës Lindore, ku janë pranuar në NATO. Tanimë , pengesë është hezitimi i vendeve mosnjohëse për mbështetjen e Kosovës, përndryshe pjesa tjetër duke përfshirë sistemin politik si një vendi i dëshmuar tashmë demokratik deri te shumë zhvillime e reforma që kemi bërë dhe veçanërisht sistemin tonë të mbrojtjes ne tanimë jemi vend, i cili do të duhej të ishte pjesë e NATO-s”, deklaroi ai në Tëvë1.
Ai gjithashtu ka theksuar se Ligji i Mbrojtjes i ShBA-së hap rrugën për promovimin e anëtarësimit të Kosovës dhe Bosnjës në NATO, duke i dhënë vendit mundësi të përshpejtojë hapat drejt Aleancës.
“Tashmë është një momentum i ri, veçanërisht, pasi Ligji i Mbrojtjes së ShBA-së në një farë forme promovon anëtarësimin e Kosovës dhe Bosnjës në NATO, si dy vende të vetme të Ballkanit Perëndimor të paanëtarësuara deri më tani, dhe besoj që edhe faktorë të tjerë, duke përfshirë edhe situatën globale të sigurisë do t’i japin mundësi vendit tonë për të përshpejtuar hapat drejt anëtarësimit në NATO”, u shpreh Maqedonci.
Maqedoni për fund tha se Kosova në një periudhë të shkurtër do të jetë pjesë e NATO-s.
“Unë vlerësoj që pa dhënë ndonjë afat të caktuar, mund të them që vendi ynë po ecë në drejtim të duhur të anëtarësimit në NATO, mundësitë i kemi, edhe në aspektin gjeostrategjik janë krijuar rrethana më të favorshme. Duke pasur parasysh gjendjen aktuale, zhvillimet që i kemi bërë brenda vendit, unë vlerësoj se në një periudhë të shkurtër pa dhënë ndonjë datë, apo vit të caktuar, Kosova do të jetë pjesë e NATO-s dhe ne asnjëherë nuk kemi hezituar, nuk kemi pasur drejtim tjetër përveç synimi tonë për të qenë pjesë e saj”, deklaroi ministri në detyrë. /teve1.info/
