Një 76-vjeçar është goditur nga një veturë mbrëmjen e së enjtes në rrugën “Ulqini”, në Mitrovicën e Jugut.
Lajmin e ka konfirmuar zëdhënësi i Policisë Rajonale të Mitrovicës, Avni Zahiti.
“Rreth orës 18:25, në rrugën ‘Ulqini’, ka ndodhur një aksident trafiku ku një veturë ka goditur një këmbësor”, tha Zahiti, duke shtuar se i lënduari është dërguar për tretman mjekësor.
Zëdhënësi i Spitalit Rajonal “Dr. Sami Haxhibeqiri”, Shpend Fazliu, ka konfirmuar se i lënduari është duke marrë trajtim mjekësor.
“Në ora 18:40, si pasojë e lëndimeve, një i moshuar (lindur më 1950) është sjellë në Shërbimin Emergjent të Spitalit të Mitrovicës, ku po vazhdon trajtimi dhe janë ndërmarrë masat e nevojshme reanimatore nga ekipi i mjekëve dhe infermierëve. Aktualisht po kryhet ekzaminimi radiologjik me tomografi të kompjuterizuar (CT) të kokës për të konstatuar gjendjen e saj”, tha Fazliu.
