Kryeministri britanik, Keir Starmer u ka kërkuar falje viktimave të Jeffrey Epstein për emërimin e Peter Mandelson si ambasador të Mbretërisë së Bashkuar në Shtetet e Bashkuara, pavarësisht lidhjeve të ngushta të diplomatit me abuzuesin e ndjerë seksual.
“Ishte e njohur publikisht për njëfarë kohe që Mandelson e njihte Epsteinin, por askush prej nesh nuk e dinte thellësinë dhe errësirën e asaj marrëdhënieje”, tha Starmer në një fjalim të mbajtur nga Anglia jugore të enjten.
Kryeministri e kishte emëruar Mandelson ambasador në SHBA në dhjetor 2024.
“Më vjen keq”, tha Starmer, duke iu drejtuar viktimave me kërkim falje. “Më vjen keq për atë që ju është bërë, më vjen keq që kaq shumë njerëz me pushtet ju kanë zhgënjyer, më vjen keq që i kemi besuar gënjeshtrave të Mandelsonit dhe e kemi emëruar atë”.
Starmer e shkarkoi Mandelson shtatorin e kaluar pasi u publikuan email-e që tregonin se ai mbante një miqësi me Epstein pas dënimit të financierit të ndjerë amerikan në SHBA në vitin 2008 për vepra penale seksuale që përfshinin të mitur.
Por kryeministri tani përballet me presion të ri për emërimin, pasi Departamenti i Drejtësisë i SHBA-së javën e kaluar publikoi dosje që zbulojnë detaje të reja të marrëdhënies së ngushtë të Mandelson me Epstein.
Dosjet sugjeronin gjithashtu se Mandelson i kishte zbuluar dokumente qeveritare Epsteinit dhe se Epstein kishte regjistruar pagesa për Mandelsonin ose partnerin e tij të atëhershëm, tani bashkëshorti i tij.
Mandelson, i cili tani është nën hetim policor për dyshime për sjellje të pahijshme në detyrë, tha se nuk kujtohet të ketë marrë pagesa dhe nuk ka komentuar publikisht mbi akuzat se ka zbuluar dokumente.
