Elbert Krasniqi, nga Iniciativa e Re Demokratike e Kosovës (IRDK), në emër të grupit parlamentar multietnik – që përfshin partitë KDTP, VAKAT, NDS, IRDK, PSA, SPO dhe LPRK – ka shprehur shqetësimin lidhur me vendimin e Gjykatës Kushtetuese për ankesën e Listës Serbe mbi zgjedhjen e nënkryetarit serb të Kuvendit.
Sipas Krasniqit, zgjedhja e Nenad Rashiqit në tetor 2025 ishte në përputhje me Kushtetutën, pasi u përmbushën dy kushte kyçe: kandidimi erdhi nga radhët e komunitetit serb dhe zgjedhja u bë me shumicën e votave të deputetëve të Kuvendit.
“Ky ka qenë votim legjitim, ligjor dhe proceduralisht i rregullt, që shpreh vullnetin politik të 71 deputetëve, vullnet që, sipas mendimit tonë, është anashkaluar nga Gjykata,” ka thënë Krasniqi.
Ai ka kritikuar Gjykatën për mosmarrjen në konsideratë të një fakti thelbësor: diskriminimin që do t’i shkaktohej një deputeti serb nëse i mohohej e drejta për të kandiduar vetëm për shkak të përkatësisë partiake.
“Mohimi i kësaj të drejte krijon një precedent të rrezikshëm, ku përkatësia partiake mbizotëron mbi përkatësinë komunitare, një standard që nuk buron nga Kushtetuta e Republikës së Kosovës,” ka shtuar ai.
Krasniqi vuri në dukje se vendimi gjithashtu duket sikur injoron ekzistencën politike të Rashiqit.
“Mesazhi që mund të perceptohet është i thjeshtë dhe shqetësues: nëse nuk jeni pjesë e Listës Serbe, jo vetëm që e keni pothuajse të pamundur të zgjidheni, por rrezikoni të mos trajtoheni si përfaqësues legjitim i komunitetit tuaj,” ka deklaruar ai.
Ai ka theksuar se mbrojtja e komuniteteve joserbe nuk arrihet duke kufizuar pluralizmin politik, por duke garantuar barazi reale ndërmjet përfaqësuesve.
“Bëjmë thirrje që ky aktgjykim të lexohet me kujdes në dritën e pasojave që mund të prodhojë për përfaqësimin demokratik. Republika e Kosovës nuk është ndërtuar mbi monopole politike, por mbi lirinë e përfaqësimit dhe barazinë kushtetuese të të gjithë qytetarëve të saj,” ka përfunduar Krasniqi.
Në aktgjykimin e publikuar të mërkurën, Gjykata Kushtetuese ka theksuar se nënkryetari serb i Kuvendit duhet të zgjidhet nga njëri prej nëntë deputetëve të Listës Serbe, si shumicë brenda komunitetit, dhe e drejta e propozimit i takon vetëm shumicës së deputetëve të komunitetit.
