Diplomati sllovak, Miroslav Lajçak ka dhënë dorëheqjen nga posti i këshilltarit të sigurisë kombëtare të kryeministrit Robert Fico, pas publikimit të dokumenteve të Departamentit të Drejtësisë të SHBA-së që tregojnë se ai ka shkëmbyer mesazhe me abuzuesin e dënuar seksual Jeffrey Epstein.
Dorëheqja erdhi një ditë pasi Departamenti Amerikan i Drejtësisë publikoi miliona dosje që lidhen me Epstein.
Disa nga komunikimet e publikuara tregojnë Epstein dhe Lajçak duke diskutuar për diplomacinë dhe gratë, duke përfshirë shkëmbime në të cilat Epstein tallte Lajçak dhe i ofronte atij gra.
Duke folur publikisht për herë të parë në një intervistë me programin Otvorene të Rddio Slovensko , Lajçak tha se nuk i kujtohen mesazhet. “Sinqerisht s’më kujtohen ato diskutime”, tha ai, duke shtuar, “As s’mund t’i konfirmoj, as t’i mohoj.”
Pasi i rilexoi mesazhet, ai tha se ndihej “si idiot”. Ai shtoi: “Por kjo nuk më liron nga përgjegjësia. Tregova gjykim të dobët dhe komunikim të papërshtatshëm. Ato mesazhe nuk ishin gjë tjetër veçse ego mashkullore budallaqe…”
Lajçak tha se e takoi Epstein në vitin 2017, pasi mbërriti në Nju Jork për një post njëvjeçar në Kombet e Bashkuara, pasi ishte prezantuar nga një diplomat i lartë i huaj.
Ai tha se Epstein ishte i njohur gjerësisht në atë kohë dhe takohej rregullisht me figura të shquara politike dhe biznesi, gjë që e bëri të besonte se nuk kishte problem në mbajtjen e kontaktit.
Edhe pse më vonë u bë i vetëdijshëm për dënimin e Epstein për krime seksuale në vitin 2008, Lajçak tha se shumë figura me ndikim vazhduan të shoqëroheshin me të, duke e përforcuar këtë bindje.
Ai konfirmoi se kishte vizituar apartamentin e Epstein, por këmbënguli se ishin të pranishme figura të tjera politike dhe të biznesit dhe se “nuk kishte vajza”.
Lajçak shërbeu si Përfaqësues Special i Bashkimit Evropian për dialogun Kosovë-Serbi nga prilli i vitit 2020 deri vitin e kaluar, kur u zëvendësua nga Peter Sorensen i Danimarkës.
