Një incident ka ndodhur mbrëmjen e së premtes në Han të Elezit, ku një mur mbrojtës është shembur mbi një veturë pasagjerësh në rrugën “28 Nëntori”, duke lënë të bllokuar shoferin brenda automjetit.
Lajmin e ka konfirmuar për teve1.info zëdhënësi i Policisë për rajonin e Ferizajt, Kanun Veseli, i cili ka bërë të ditur se menjëherë pas pranimit të informatës, në vendin e ngjarjes kanë dalë njësitë e Emergjencës dhe njësia e Zjarrfikësve nga Hani i Elezit, të cilët kanë nisur ndërhyrjen për nxjerrjen e personit të bllokuar në veturë.
“Në veturë ndodhej vetëm shoferi, i cili ka qenë me vetëdije, por i ngujuar brenda automjetit”, ka deklaruar Veseli.
Edhe Policia e Kosovës në raportin 24-orësh ka jep më shumë detaje lidhur me incidentin, ku ka bërë të ditur se me rekomandim të AME-së familjet afër vendit të ngjarjes janë evakuuar.
“Fsh. Meliq, Hani i Elezit 30.01.2026 – 20:45. Është raportuar se një muri mbrojtës i rrugës së lartcekur është shembur dhe si pasojë ka zënë një automjet në të cilën gjendej viktima mashkull kosovar. Në vendin e ngjarjes kanë dalë policia, zjarrfikësit, emergjenca të cilët kanë nxjerrë viktimën nga vetura dhe është dërguar në QKUK për tretman mjekësor. Është njoftuar prokurori si dhe AME dhe me rekomandim të tyre familjet afër vendit të ngjarjes janë evakuuar ndërsa një patrullë policore mbeten në sigurim të vendit të ngjarjes deri në zhvillimet e radhës”, thuhet në raport./teve1.info/
Shtypet vetura nga shembja e murit në Han të Elezit, dërgohet në spital shoferi
