Nga një zyre në Ferizaj, nëntë persona akuzohen se mashtruan dhjetëra shtetas të huaj.
Nga këto mashtrime, sipas Prokurorisë, përfitimet për këta të akuzuar që sot e patën paraqitjen e parë para gjykatës, ishin milionëshe.
Përfitimet e kundërligjshme, prokurorja Habibe Salihu tregoi se u bënë përmes kontaktimit të viktimave, dhe bindjes së tyre që të investojnë nplatorma si “Option888” dhe “Krack”, duke u përdorur si ombrellë një kompani e rreme investimesh.
“Kanë bindur edhe qytetarë të tjerë që të dërgojnë mjete financiare për kthimin e investimeve. Pastaj i akuzuari Blerim Qerimi, i cili kishte rolin e IT, pasi i ka bindur se mjetet materiale transferohen në platformën “Krack” e cila është një platformë e cila mund të gjenerojë para, në momentin kur të dëmtuarit i kanë dërguar paratë në platformën “Krack”, atëherë paratë që të dëmtuarit i kanë investuar janë transferuar brenda 30 sekona në Kosovë. Pas dy orëve të akuzuarit Blerim dhe Kushtrim, paratë që janë dërguar përmes kësaj platforme në shumë prej 96 mijë euro e shumë shuma të tjera, i kanë tërhequr dhe i kanë nxjerrë në zyrën CallCenter, pastaj i kanë ndarë mes vete të gjithë të akuzuarit”, deklaroi prokurorija special, Habibe Salihi.
Viktima, prokurorja tregoi se ishin kryesisht shtetas gjerman dhe austriak.
“Është dëmtuar Hans Petersen në shumën 1 milion e 900 mijë euro. I dëmtuari Grok Shtevan në shumën 500 euro. I dëmtuari Fahri Peter në shumën 6 mijë 250 euro. I dëmtuari Kursten Marks në shumën 500 euro. I dëmtuari Reter Oliver në shumën 55 mijë e 888 euro. I dëmtuari Roth Sarand është dëmtuar në shumën 22 mijë e 270 euro. I dëmtuari Schkutzer është dëmtuar në shumën 30 mijë e 500 euro. I dëmtuari Dull Hernan është dëmtuar në shumën 173 mijë euro”, deklaroi Salihi.
Këto akuza nuk i pranoi asnjëri prej të akuzuarve, duke u deklaruar të pafajshëm.
E mbrojtja e njërit prej tyre pati vërejtje në mënyrën se si prokuroria ka listuar provat.
“Këtu prokuroria ka paraqit listë të provave, por nuk ka specifiku se cila provë është për Venera Mehmetin. Unë mendoj që i kontribuon procesit por edhe prokurorisë, t’i specifikojë provat sipas dispozitivave të aktakuzës dhe sipas të akuzuarve”, deklaroi avokati i Venhera Mehmetit, Visar Vehapi.
Njëri prej të akuzuarve, Naser Smajli, akuzohet po ashtu edhe për armëmbajtje pa leje, vepër të cilën ai e pranoi.
Prandaj, rasti ndaj tij u veçua.
Në seancat e radhës do të vazhdohet me paraqitjen e provave dhe dëgjimin e dëshmitarëve.
