Por, të mërkurën, kjo ishte pamja që e karakterizoi rrugën “Mark Isaku” në kryeqytet.
Ani pse kontejnerët u panë të zbrazur, afër tyre po vazhdojnë të shihen mbeturinat inerte.
E qytetarët thonë se me një problem tillë janë duke u përballur që një kohë të gjatë.
Andaj, të njëjtit po kërkojnë edhe vendosjen e kamerave si masë parandaluese.
“Ne si qytetarë nuk jemi të ndërgjegjësim, po i hedhim mbeturinat që nuk janë për tu gjuajtur këtu, domethënë shtretër të vjetër dyshek e këso gjërash. Ka mbi dhjetë vite që është kështu.E mira kishte me qenë të vendoset një kamerë dhe një shenjë që është nën vëzhgim ndoshta pak nga frika nuk do të hedhin këto”, thotë Armend Hoxha – qytetar.
E pamje të ngjashme, shihet edhe në lagjet e tjera të Prishtinës.
Edhe në “Ulpianë” qytetarët kanë halle të njëjta.
Por këta shtojnë se kontejnerët po mbushen edhe nga bizneset.
“Është fluksi kaq i madh këtu për t’i hedhur mbeturinat jo vetëm banorët, por edhe lokalet përreth që janë edhe ata i hedhin këtu, prandaj ata s’po arrijnë. Vijnë me rregull, por ne si qytetar nuk i hedhim aty ku duhet por i qesim rreth kontejnerëve”, shprehet qytetari Bejtë Jusufi.
Ndërsa, për këtë gjendje me mbeturina në Prishtinë kanë reaguar edhe nga organizatat për mbrojtjen e mjedisit.
“Është për të ardhur keq që Prishtina po vazhdon të përballet me këtë ndotje. Vazhdon të jetë papërgjegjësi e një pjesë të konsiderueshme të qytetarëve të cilët vazhdojnë të sillen me papërgjegjësi ndaj mjedisit. Po në anën tjetër duhet të themi që është edhe një papërgjegjësi institucionale të cilat janë përgjegjëse që kjo situatë të mos jetë kështu. Komuna e Prishtinës së bashku me akterët e tjerë siç është “Pastrimi” duhet të ulen e të bisedojnë seriozisht për të zgjidhur këtë problematik”, shprehet Luan Hasanaj nga “LET’S DO IT KOSOVA”.
E nga Kompania Regjionale e Mbeturinave “Pastrimi”, thonë se ky lloj i mbeturinave, nuk përfshihet në grumbullimin ditor.
Madje për to, thonë se nuk kanë një kontratë aktive.
“Sa i përket mbeturinave vëllimore dhe inerte, këto nuk përfshihen në grumbullimin e rregullt ditor të mbeturinave shtëpiake, për shkak të natyrës së tyre specifike dhe kërkesave teknike që kanë për largim. Aktualisht, nuk kemi kontratë të veçantë aktive për largimin sistematik të mbeturinave vëllimore. Megjithatë, në bashkëpunim të ngushtë me Drejtorinë e Shërbimeve Publike në Komunën e Prishtinës, jemi në fazën përgatitore që shumë shpejt të fillojmë me largimin e të gjitha mbeturinave vëllimore të akumuluara në qytet. Ky proces do të realizohet në mënyrë të koordinuar dhe të planifikuar, me qëllim rikthimin e rendit dhe pastërtisë në hapësirat publike”, thuhet nga kompania“Pastrimi”.
Ndërsa, Tëvë1 ditë më parë ka raportuar për një gjendje të njëjtë me mbeturina edhe në lagjen Kodra e Trimave në Prishtinë.
