Autore: Jona Kelmendi
Gara për drejtimin e Lidhjes Demokratike të Kosovës tashmë ka nisur.
E kjo, pritet të finalizohet me 31 janar, kur LDK do ta mbaj Kuvendin.
Në të, pritet të vendoset edhe fati i kryetarit aktual, Lumir Abdixhiku.
Ky i fundit, dorëheqjen e tij, e ka lënë në duart e bashkëpartiakëve.
E të dielën, u bë i ditur emri i kundërkandidatit të Lumir Abdixhikut.
Besimin e delegatëve të LDK-së me 31 janar, do ta kërkoj ish-kryeministri i Kosovës, Avdullah Hoti.
Këtë e bëri të ditur vet Hoti, përmes një postimi në Facebook.
“Në këtë moment vendimtar për LDK-në dhe për Kosovën, unë zotohem me përgjegjësi të plotë të marr barrën e ringritjes politike dhe organizative të partisë. Zotohem të udhëheq një proces tërësisht gjithëpërfshirës, transparent dhe në përputhje të plotë me Statutin, ku secili anëtar, çdo degë dhe çdo forum ka zë dhe rol aktiv në ringritjen e LDK-së dhe në vendimet që marrim si shtëpi politike e demokracisë”, ka shkruar Hoti.
E garat e tilla brenda partisë, sipas profesorit Avdi Smajlaj, janë të mirëseardhura.
“Është e drejtë legjitimë e secilit anëtarë të LDK të paraqesë ambiciet e veta politike për të qenë në krye të të LDK-së në bazë të kësaj mendoj që sa më shumë që ka kandidatura këto i shtojnë edhe konkurrencës së brendshme të partisë dhe rrjedhimisht kualitetit, cilësisë dhe lidershipit të LDK-së megjithatë në seancën e Kuvendit të paraparë me 31 janar tani mbetet të shihet se a është në rend dite vetëm dorëheqja e Abdixhikut, por megjithatë kuvendi e ka në kompetencë që të fus në rend të ditës propozimet e kandidaturave të reja”, tha ai.
Sipas Smajlajt, ish-kryeministri Hoti ka përvojë si udhëheqës.
“Gjatë mandatit të tij edhe në pozita të tjera ka reflektu si udhëheqës, edhe në bazë të kësaj po shpresoj që mund t’i jap LDK-së, e krahas kësaj prapë mbetet brenda LDK-së që duhet të vendos se kush por ajo që do të vlerësohet nga ta është që sa më shumë të këtë kandidatura kto e rrisin konkurrencën dhe rrjedhimisht pritet që kjo të jap një lidership sa me cilësor për LDK-në”, ka thënë”, ka thënë Smajljaj.
Hoti në njoftimin e tij, ka bërë thirrje për unitet, guxim politik dhe rikthim të vlerave themeltare të LDK-së, përfshirë demokracinë e brendshme dhe orientimin euro-atlantik të Kosovës.
