Ish-kryeprokurori i Prizrenit, Sylë Hoxha, ka vlerësuar si të mirëpërgatitur aksionin e fundit të institucioneve të drejtësisë në rajonin e Prizrenit, duke theksuar se në këtë proces pritet të dalin dyshime të bazuara për veprat e dyshuara penale që lidhen me zgjedhjet.
Sipas Hoxhës, angazhimi i një numri të madh prokurorësh, hetuesish policorë dhe zyrtarësh të tjerë tregon seriozitetin e aksionit dhe përgatitjen profesionale të Prokurorisë.
“Një aksion shumë i madh për rajonin e Prizrenit, duke pasur parasysh që kanë qenë të angazhuar kryeprokurorë, hetues policorë dhe shumë persona të tjerë. Shihet se është aksion mjaft mirë i përgatitur dhe tash të shohim, Prokuroria sigurisht i ka grumbulluar provat e nevojshme. Ne presim që do dalin me një dyshim të bazuar”, deklaroi ai në emisionin “Info Nata” në Tëvë1.
Ai theksoi se sigurimi i provave, veçanërisht atyre që lidhen me blerjen e votës, nuk është proces i lehtë, por shprehu besimin se prokurorët e çështjes do të arrijnë ta përmbyllin me sukses hetimin.
“Sigurimi i votave nuk do të jetë bash e lehtë. Por, duke pasur parasysh profesionalizimin e prokurorëve të çështjes besoj se do të ia dalin e do të grumbullohen provat e vërteta do të dal në shesh”, u shpreh Hoxha.
Hoxha ka theksuar gjithashtu se përgjegjësia për parregullsitë e dyshuara nuk bie vetëm mbi subjektet politike dhe kandidatët, por edhe mbi Komisionin Qendror të Zgjedhjeve (KQZ), i cili, sipas tij, duhet të japë llogari për procesin e licencimit të komisionerëve.
“Edhe KQZ-ja është e ndërlidhur dhe duhet të ketë përgjegjësi, sepse siç u tha edhe familjarët e kandidatëve kanë qenë të kyçur. Përveç subjekteve dhe kandidatëve, besoj që edhe KQZ-ja është dashur me ditë kë po e licencon, kush do të jenë komisionerë?”, dekla roi ai.
Prizreni sot ka qenë cak i një aksioni të madh të Prokurorisë Themelore në këtë qytet. Mbi 100 komisionerë janë intervistuar, sit ë dyshuar për manipulimin me mbi 68 mijë votave. Kryeprokurori i Prizrenit, Petrit Kryeziu, theksoi se intervistimit nuk do t’i shpëtojnë as kandidatët të cilëve iu hoqën votat pas rinumërimit.
Hetimet lidhur me parregullsitë e dyshuara zgjedhore pritet të vazhdojnë, derisa pasditen e sotme është bërë e ditur se edhe në Komunën e Malishevës kanë nisur hetimet për manipulimin e votave. /teve1.info/
