Organizata e Veteranëve të Luftës së UÇK-së ka reaguar ashpër ndaj ligjëratave dhe aktiviteteve që, sipas saj, po zhvillohen nga ose në emër të Dhomave të Specializuara, duke i cilësuar ato si përpjekje për “kontroll të dëmit” dhe menaxhim të imazhit publik të kësaj gjykate.
Në reagimin e saj, OVL e UÇK-së thekson se këto aktivitete nuk janë ligjërata të rastësishme apo edukative, por përpjekje të qëllimshme për të ndikuar në opinionin publik, veçanërisht tek të rinjtë, në një kohë kur besueshmëria e Gjykatës Speciale është dëmtuar rëndë nga, siç thuhet, shkelje të njëpasnjëshme të të drejtave themelore të të akuzuarve dhe të rendit kushtetues të Republikës së Kosovës.
Veteranët kërkojnë që Gjykata Speciale, në vend të fushatave propagandistike, të fokusohet në respektimin e Kushtetutës së Kosovës, ligjeve vendore dhe standardeve ndërkombëtare të drejtësisë, për të rikthyer besimin e publikut.
Në reagim bëhet një krahasim me veprimet e pushtetit të ish-Jugosllavisë pas demonstratave të vitit 1981, kur, sipas OVL-së, përmes mbledhjeve dhe propagandës institucionale, përgatitej terreni politik dhe psikologjik për dënime të ashpra ndaj rinisë shqiptare.
OVL e UÇK-së rendit disa shkelje që, sipas saj, kanë dëmtuar rëndë besueshmërinë e Gjykatës Speciale, përfshirë ndjekjen penale selektive vetëm ndaj UÇK-së, zgjatjen e pajustifikueshme të paraburgimit, refuzimin e lirimit të përkohshëm edhe për arsye humanitare, mungesën e transparencës dhe ndërhyrjen në fusha të ndjeshme shoqërore si arsimi, pa autorizim institucional dhe debat publik.
