Shiritat u vendosën e perimetri u sigurua.
Kjo meqë argjendaria Oxa Gold në lagjen “Agim Ramdani”, në Prishtinë qe cak i vjedhjes.
Ani pse e gjithë vjedhja dyshohet të jetë kryer nga një pjesë tjetër e këtij lokali, këtë të hënë u mbikëqyr e tërë hapësira nga forcat e rendit.
“Dyshohet që vlera e arit e grabitur në këtë argjendari të jetë tejet e madhe”.
E nga polica e Kosovës kanë pohuar se këta janë duke e trajtuar rastin si “Vjedhje e rëndë”.
“Sot rreth orës 10:00 kemi pranuar informatën për një rast Vjedhje e rëndë, që ka ndodhur në një lokal, në rrugën Agim Ramadani në Prishtinë. Zyrtarët nga Njësiti i hetimeve të Përgjithshme-Prishtinë, në koordinim të plotë me prokurorinë janë duke punuar për zbardhjen e rastit si dhe identifikimin e personave të dyshuar”, kanë njoftuar nga Policia e Kosovës.
Ndërsa, përveç policisë në vend të ngjarjes u panë edhe ekipet e forenzikës.
Kurse, vet pronari i argjendarisë për shkak të gjendjes nuk deshi të flas për rastin. Mirëpo një familjar i tij thotë se dëmi i shkaktuar është tejet i madh dhe hedh akuza për kompaninë që e siguron këtë objekt për që nuk është reaguar me kohë.
“Sa një kerr i mirë, diçka prej me të mirëve. “Besa Security’, shumë pare mbledh shumë të hyra merr nëpër lagje nëpër lokale nëpër krejt edhe nga një herë kur e harrojmë alarmin ndezë thirr për pesë minuta, domethënë u bë vjedhja as s’ka ardh as s’ka shiku as hiç”, ka thënë pronari i argjendarisë.
I njëjti, thotë se institucionet përgjegjësi duhet bërë më shumë për të tilla raste.
“Sot kanë vjedhë këtu, më parë te një kojshi atje po duhet me u vetëmbrojtje, policia dhe institucionet duhet me marr masa më shumë”, u shpreh tutje ai.
E pas disa orësh hetime edhe shiritat u hoqën nga vendi i ngjarjes, e lokali mbet i mbyllur për klientët.
