Deputeti i zgjedhur i Lidhjes Demokratike të Kosovës (LDK), Anton Quni, ka reaguar publikisht lidhur me raportimet për parregullsi dhe manipulime të votave në Qendrën e Numërimit në Prizren, duke mohuar çdo përfshirje personale në këto zhvillime.
Quni ka theksuar se çdo rritje e votave në emrin e tij është bërë pa dijeninë dhe pa vullnetin e tij, duke e cilësuar këtë veprim si cenim serioz të procesit zgjedhor.
“Dëshiroj të bëj të ditur me përgjegjësi të plotë se çdo rritje e votave në emrin tim është bërë pa dashjen dhe pa dijeni timen. Unë nuk kam kërkuar, inkurajuar apo asistuar në asnjë formë devijimin e vullnetit të qytetarëve. Kjo ngritje artificiale e votave nuk përfaqëson mbështetjen time reale dhe as parimet e mia njerëzore. Përmes këtij operacioni, i cili nuk mund të cilësohet ndryshe veçse si kriminal, më është njollosur personaliteti dhe karriera. Përfshirja e emrit tim në skema të tilla manipuluese është një goditje e rëndë për dinjitetin tim dhe besueshmërinë që kam ndërtuar me vite para elektoratit”, ka thënë Quni në një postim në Facebook.
Ai ka vlerësuar se manipulimi i dyshuar ka dëmtuar rëndë imazhin dhe karrierën e tij politike, duke e cilësuar gjithë procesin si një operacion kriminal që ka njollosur personalitetin dhe besueshmërinë e ndërtuar ndër vite te elektorati.
Deputeti i LDK-së ka kërkuar ndjesë publike ndaj kandidatëve të tjerë, votat e të cilëve mund të jenë tjetërsuar në favor të tij, duke theksuar se gara zgjedhore duhet të jetë e ndershme dhe çdo votë duhet t’i takojë atij që e ka fituar me meritë.
Në fund, Quni ka deklaruar se është plotësisht i gatshëm të bashkëpunojë me Policinë, Prokurorinë dhe institucionet e tjera relevante për të zbardhur këtë skandal deri në fund, duke theksuar se e vërteta është mbrojtja e tij e vetme.
