Presidenti amerikan, Donald Trump paralajmëroi të enjten se mund të aktivizojë Aktin e Kryengritjes dhe të dërgojë trupa për të shtypur protestat e vazhdueshme kundër oficerëve federalë të dislokuar në Minneapolis për zbatimin e politikave të ashpra të administratës së tij ndaj imigracionit.
Kërcënimi erdhi një ditë pasi një oficer federal i imigracionit qëlloi dhe plagosi një banor të Minneapolis, i cili dyshohet se e kishte sulmuar oficerin me një lopatë dhe një dorezë fshese.
Ngjarja përshkallëzoi më tej tensionet, frikën dhe zemërimin që kanë përfshirë qytetin e Minesotës që nga momenti kur një agjent i Zbatimit të Imigracionit dhe Doganave (ICE) qëlloi për vdekje në kokë Renee Good.
Trump ka përsëritur vazhdimisht kërcënimin për përdorimin e këtij ligji federal të rrallë, i cili i jep presidentit kompetencën të dislokojë ushtrinë amerikane ose të federalizojë Gardën Kombëtare për zbatimin e ligjit brenda vendit, pavarësisht kundërshtimeve nga guvernatorët e shteteve.
“Nëse politikanët e korruptuar të Minesotës nuk i binden ligjit dhe nuk i ndalojnë agjitatorët dhe kryengritësit profesionistë të sulmojnë Patriotët e ICE-së, të cilët po përpiqen vetëm të bëjnë punën e tyre, unë do të miratoj AKTIN E KRYEGRITJES, të cilin shumë presidentë e kanë bërë para meje, dhe do t’i jap shpejt fund absurditetit që po ndodh në atë shtet dikur të madh”, tha Trump në një postim në rrjetet sociale.
Historikisht, presidentët amerikanë e kanë përdorur Aktin e Kryengritjes më shumë se dy duzina herë, për herë të fundit në vitin 1992 nga presidenti George H. W. Bush për t’i dhënë fund trazirave në Los Angeles, atëherë me kërkesë të autoriteteve lokale.
Ndërkohë, Departamenti i Sigurisë Kombëtare njoftoi se ka kryer mbi 2,000 arrestime në këtë shtet që nga fillimi i dhjetorit dhe theksoi se nuk do të tërhiqet nga veprimet e tij, ka raportuar Associated Press. ICE është një agjenci në varësi të DHS-së.
Protestat janë bërë të shpeshta në rrugët e Minneapolis që nga 7 janari, kur agjenti i ICE-së qëlloi për vdekje 37-vjeçaren Good.
