U.D. Kryeshefi Ekzekutiv i KOSTT, Shaban Neziri, priti të enjten në takim drejtorin e Agjencisë së Kosovës për Inteligjencë (AKI), Petrit Ajeti.
Në komunikatën për media të KOSTT, bëhet e ditur se gjatë takimit, u diskutua rëndësia strategjike e sektorit energjetik dhe roli i KOSTT-it në mbrojtjen e infrastrukturës kritike, planet zhvillimore, si dhe çështjet e sigurisë shtetërore që lidhen me funksionimin e qëndrueshëm të sistemit elektroenergjetik.
“Vizita ofroi mundësinë për t’u njohur më nga afër me punën dhe masat që KOSTT ka ndërmarrë për të siguruar stabilitetin dhe besueshmërinë e rrjetit, si dhe kapacitetet që kontribuojnë në sigurinë e infrastrukturës vitale. Takimi u zhvillua në kuadër të bashkëpunimit institucional për identifikimin dhe adresimin e rreziqeve që mund të prekin sigurinë e vendit, me fokus të veçantë te kërcënimet ndaj infrastrukturës kritike. U theksua rëndësia e parandalimit dhe trajtimit të çdo rreziku që mund të ndikojë në funksionimin e sistemit elektroenergjetik”, thuhet në komunikatë.
KOSTT e vlerëson këtë vizitë si dëshmi të angazhimit të përbashkët për forcimin e sigurisë dhe qëndrueshmërisë së infrastrukturës energjetike në Republikën e Kosovës, thuhet po aty.
