Danimarka ka filluar të vendosë pajisje ushtarake dhe trupa të përparuara në Grenlandë, mes tensioneve në rritje mbi rëndësinë strategjike të ishullit Arktik dhe retorikës kwrcwnuese nga SHBA-ja, sipas raportimeve të medias daneze.
Një komandë paraprake është dërguar tashmë në Grenlandë për të përgatitur logjistikën dhe infrastrukturën për mbërritjen e mundshme të forcave më të mëdha daneze dhe aleate, raportoi të mërkurën transmetuesi lokal DR.
Roli i njësisë së përparuar përfshin sigurimin që objektet dhe linjat e furnizimit të jenë gati për të pritur forcat kryesore në një fazë të mëvonshme.
Përforcimet pritet të përfshijnë ushtarë nga njësitë e Ushtrisë Daneze, me synimin për të forcuar praninë e Forcave të Armatosura Daneze në ishull.
Megjithatë, pjesa më e madhe e aftësisë luftarake të mbetur të Danimarkës është aktualisht e angazhuar në misionet e NATO-s në shtetet baltike.
Sipas zëdhënësit të partisë së majtë daneze Enhedslisten, trupave daneze së shpejti do t’u bashkohen edhe forca ndërkombëtare.
“Kjo është diçka që e kemi kërkuar gjatë javës së kaluar. Është një veprim i mençur. Dhe unë e kuptoj që trupa nga vende të tjera evropiane janë gjithashtu në rrugën e tyre për në Grenlandë. Dhe është sinjali i duhur për t’i dërguar çdo fuqie të madhe që mund të ketë idenë e keqe për të sulmuar Grenlandën”, i tha ai DR.
Grenlanda, një territor vetëqeverisës brenda Mbretërisë së Danimarkës, ka tërhequr interesin e SHBA-së për shkak të vendndodhjes së saj strategjike dhe burimeve të mëdha minerale.
Danimarka dhe Grenlanda kanë refuzuar propozimet për të shitur territorin, duke riafirmuar sovranitetin danez mbi ishullin.
