Mesfushorët Medon Berisha dhe Ylber Ramadani, do t’i mungojnë skuadrës së Lecces në përballjen kundër Interit.
Kjo ndeshje është e mbetur dhe i takon xhiros së 16-t të Serie A të Italisë, ndërsa luhet sonte prej orës 20:45.
Berisha nuk është rikuperuar plotësisht nga lëndimi që e pësoi në muajin dhjetor dhe kundër Interit do të jetë ndeshja e pestë rresht kampionale që i mungon Lecces.
Ndërkohë, Ramadani nuk do të jetë në dispozicion të trajnerit Eusebio Di Francesco për shkak të suspendimit dhe mungesa e dy mesfushorëve të Shqipërisë do të ndihet tek Lecce në këtë ndeshje të rëndësishme.
Interi, aktualisht është lider në Serie A me 43 pikë pas 19 ndeshjeve të zhvilluara, ndërsa Lecce ka tubuar 17 pikë dhe renditet në pozitën e 17-të në tabelë.
Sot, por prej orës 18:30 luhet edhe ndeshja tjetër e mbetur e xhiros së 16-të, ajo ndërmjet Napolit dhe Parmas.
