Pas Kupës, emocionet vazhdojnë në ProCredit Superligë me shumë sfida dhe një super derbi.
Takimi kryesor i kësaj jave zhvillohet në dielën nga ora 17-00 në Mitrovicë me sfidën ndërmjet Trepçës dhe Sigal Prishtinës, dy skuadrat rivale, me traditë dhe me shumë trofe në basketbollin e Kosovës.
Pas 13 ndeshjeve, ‘Xehetarët’ janë liderë me dhjetë fitore e tri humbje, ndërsa bardhekaltrit kanë shtatë fitore e gjashtë humbje.
Ka një kohë të gjatë që Prishtina nuk fiton ndaj Trepçës, që në dy vitet e fundit ka fituar të gjithë trofetë e mundshëm. Madje mitrovicasit kishin fituar edhe duelin e fundit në ligë, të javës së shtatë në Prishtinë, me rezultat 80-75.
Atmosfera pritet të jetë e jashtëzakonshme në ‘Minatori’, si gjithmonë në duelet derbi mes këtyre dy skuadrave.
Ndeshje interesant pritet ndërmjet Golden Eagle Yllit dhe Rahoveci 029, ku fitorja është shumë e rëndësishme për të dy skuadrat. Therandasit kanë katër fitore e nëntë humbje, kurse ‘Vreshtarët’ pesë fitore e tetë humbje.
Bashkimi-Bora është një tjetër sfidë interesante e kësaj që shënon edhe mbylljen e stinorit vjeshtor apo pjesës së parë të kampionatit. Prizrenasit kanë nëntë fitore e katër humbje, kurse prishtinasit pesë fitore e tetë humbje.
Java e 14-t mbyllet me sfidën ndërmjet Vëllaznimit dhe GO+ Pejës. Kuqezinjtë numërojnë katër fitore e nëntë humbje, kurse verdhezinjtë tetë fitore e pesë humbje, andaj shihet si një përballje shumë e rëndësishme për të dy skuadrat.
ProCredit Superliga-Java 14
E shtunë
17:00 Golden Eagle Ylli-Rahoveci 029
19:30 Bashkimi-Bora
E diel
17:00 Trepça-Sigal Prishtina
19:30 Vëllaznimi-GO+Peja
