Kryeministrja e Danimarkës, Mette Frederiksen ka thënë të hënën se një pushtim i Grenlandës nga SHBA-ja do të ishte fundi i aleancës ushtarake të NATO-s.
Komentet e Frederikson erdhën si përgjigjje ndaj deklaratave të presidentit amerikan, Donald Trump që kërkon që ishulli i pasur me minerale të bie nën kontrollin e SHBA-së për arsye strategjike dhe të sigurisë.
Operacioni i forcave amerikane në Karakas gjatë natës për të kapur udhëheqësin Nicolas Maduro dhe gruan e tij të shtunën në mëngjes e la botën të habitur dhe rriti shqetësimet në Danimarkë dhe Grenlandë, e cila është një territor gjysmëautonom i mbretërisë daneze dhe kështu pjesë e NATO-s.
Frederiksen dhe homologu i saj i Grenlandës, Jens Frederik Nielsen, kritikuan ashpër komentet e presidentes dhe paralajmëruan për pasoja katastrofike. Shumë udhëheqës evropianë shprehën solidaritet me ta, shkruan Associated Press.
“Nëse Shtetet e Bashkuara zgjedhin të sulmojnë ushtarakisht një vend tjetër të NATO-s, atëherë gjithçka ndalet”, tha Frederiksen për transmetuesin danez TV2 të hënën. “Domethënë, duke përfshirë NATO-n tonë dhe kështu sigurinë që është ofruar që nga fundi i Luftës së Dytë Botërore.”
Komentet e Trump të dielën, përfshirë thënien e tij para gazetarëve “le të flasim për Grenlandën pas 20 ditësh”, thelluan më tej frikën se SHBA-të po planifikonin një ndërhyrje në Grenlandë në të ardhmen e afërt.
Nielsen, në një konferencë për shtyp të hënën, tha se Grenlanda nuk mund të krahasohet me Venezuelën. Ai u bëri thirrje zgjedhësve të tij të qëndrojnë të qetë dhe të bashkuar.
“Nuk jemi në një situatë ku mendojmë se mund të ketë një marrje të kontrollit të vendit brenda natës dhe kjo është arsyeja pse po këmbëngulim që duam bashkëpunim të mirë”, tha ai.
Nielsen shtoi: “Situata nuk është e tillë që Shtetet e Bashkuara mund ta pushtojnë thjesht Grenlandën.”
