Disa orë pas një operacioni ushtarak amerikan që rrëzoi nga pushteti udhëheqësin venezuelian Nicolas Maduro duke e kapur atë dhe bashkëshorten e tij, Presidenti Donald Trump deklaroi se Shtetet e Bashkuara do të merrnin drejtimin e Venezuelës, të paktën përkohësisht, dhe do të shfrytëzonin rezervat e saj të mëdha të naftës për t’i shitur në tregjet ndërkombëtare.
Gjatë një konference për shtyp pak orë pas operacionit, Trump tha se administrata amerikane synon të rregullojë infrastrukturën e dëmtuar të naftës së Venezuelës dhe të rifillojë prodhimin dhe eksportin, raporton Associated Press.
“Ne jemi në biznesin e naftës. Do t’ua shesim atyre”, tha Trump, duke shtuar se kompanitë e naftës do të mbulojnë kostot e rindërtimit të infrastrukturës energjetike të vendit.
I pyetur se çfarë do të ndodhte nëse SHBA-ja do të përfundonin duke administruar Venezuelën për vite me radhë, Trump sugjeroi se të ardhurat nga shitja e naftës do të përdoren për të financuar qeverisjen e vendit.
“Paratë që dalin nga toka janë shumë të konsiderueshme”, tha ai, duke theksuar se “Do të rimbursohemi për gjithçka që shpenzojmë”.
Presidenti amerikan deklaroi gjithashtu se Venezuela do të drejtohet nga një “grup” nën mbikëqyrjen e SHBA-ve dhe nuk e përjashtoi praninë e trupave amerikane në terren.
“Ne nuk kemi frikë nga ushtarët në terren”, tha Trump, ndërsa shpjegoi detaje të operacionit për kapjen e Maduros. Ai shtoi: “Ne do të sigurohemi që vendi të drejtohet siç duhet.”
Duke u kthyer te çështja e energjisë, Trump përsëriti se prioritet do të jetë riparimi i sektorit të naftës së Venezuelës, duke deklaruar se “ne do ta bëjmë naftën të rrjedhë”.
