Fillimi i vitit 2025, Rripin e Gazës e gjeti me mbi 45,000 persona të vrarë, ndërsa bombardimet izraelite, uria dhe të ftohtit kishin kapluar territorin.
Në mes përshkallëzimit të protestave mbarëbotërore që kërkonin ndalimin e luftës, përfshirë edhe ato në Izrael që kërkonin marrëveshje për kthimin e pengjeve, Izraeli detyrohet të bëhet pjesë e tavolinës së dialogut në Katar.
Me ndërmjetësimin e Katarit, Egjiptit dhe SHBA-së, u arrit një armëpushim mes Izraelit dhe Hamasit i cili hyri në fuqi më 19 janar.
Palestinezët filluan të ktheheshin në atë që kishte mbetur nga shtëpitë e tyre, në kërkim të të afërmve të tyre që kishin mbetur nën rrënoja.
Lehtësimi për banorët e Gazës nuk zgjati shumë pasi Izraeli prishi marrëveshjen ende pa hyrë në fazën e dytë, më 18 mars, duke rifilluar sulmet ajrore në Gaza. Vetëm disa ditë më pas mbeten të vrarë më shumë se 700 persona, përfshirë dhe shumë fëmijë.
Ofensivës intensive izraelite i parapriu një bllokadë totale e ndihmës më 2 mars në të gjithë territorin, e cila më pas do të dërgonte popullsinë në një krizë të ashpër urie.
Kurse, bota u trondit më 23 mars, kur forcat izraelite vranë 15 mjekë të cilët po shkonin në një operacion shpëtimi, e të cilët u varrosën në atë që OKB e quajti një “varr masiv”- krim të cilin Izraeli e pranoi por nuk u dënua asnjëherë për të.
Bombardimet dhe uria në Gaza vazhduan edhe për në muajt në vijim pandërprerë, ku në maj, UNICEF dhe WFP me një deklaratë të përbashkët paralajmëruan se kriza e urisë në Gaza tashmë ka arritur nivele alarmante.
Megjithë këtë, më 4 qershor, SHBA-ja vendosi veto ndaj një rezolute të Këshillit të Sigurimit të OKB-së që kërkonte ndalimin e luftës në territor dhe largimin e kufizimeve të ndihmës nga Izraeli. Të 14 anëtarët tjerë të Këshillit votuan në favor të rezolutës.
Në përpjekje për të thyer këtë bllokadë nga ana e Izraelit, më shumë se 500 njerëz nga e gjithë bota u nisën në korrik për në Gaza për të dërguar ndihma përmes Flotës Globale Sumud e përbërë nga 40 anije, por të njëjtit u ndaluan më 1 gusht afër Gazës në ujërat ndërkombëtare, ku aktivistët u arrestuan nga forcat detare izraelite, dhe ndihmat u konfiskuan.
Më 22 gusht, pas një krize të gjatë urie, autoriteti kryesor botëror për krizat ushqimore konfirmon zyrtarisht se në Gaza ka zi buke dhe se kishte gjasa që ajo të përhapej në të gjithë territorin pa një armëpushim dhe pa i dhënë fund kufizimeve.
Deri në fund të gushtit numri total i vdekjeve nga uria në enklavë arriti në 313, përfshirë 119 fëmijë.
Më 25 gusht, ushtria izraelit goditi me dron Spitalin Nasser në Gaza, duke lënë të vrarë të paktën 19 persona, në mesin e tyre edhe 4 gazetarë nga agjencitë më të mëdha perëndimore të lajmeve. Izraeli ka vrarë më shumë se 50 gazetarë në Gaza vetëm gjatë vitit 2025.
Më 16 shtator 2025, pas afër dy vitesh luftë, Komisioni Hetimor i OKB-së arrin në përfundimin se Izraeli ka kryer dhe vazhdon të kryejë gjenocid në Gaza.
Në arenën ndërkombëtare, kjo pasohet nga një vendim historik pak ditë më vonë, më 21 shtator, ku Britania e Madhe, Kanadaja dhe Australia shpallin njohjen zyrtare të shtetit palestinez. Njohja e tyre pasohet edhe nga Franca, Luksemburgu, Portugalia, Monako e Malta.
Pas protestave masive ndëkombëtare dhe në vet shtetin e Izraelit, si dhe dështimit të gjetjes së pengjeve nga ushtria izraelite, më 29 shtator, Trump prezantoi një marrëveshje paqeje prej 20 pikash që synonte t’i jepte fund luftës dyvjeçare në Gaza.
Ai përfshinte lirimin e të gjithë pengjeve, çarmatimin e Hamasit dhe përfundimin e ofensivës ushtarake izraelite.
Më 10 tetor, Izraeli dhe Hamasi nënshkruajnë një marrëveshje armëpushimi në Sharm el-Sheikh të Egjiptit.
Armëpushimi i brishtë u pasua më shkelje të vazhdueshme nga ana izraelite, më i madhi prej tyre kur më 28 tetor, ushtria izraelite vrau më shumë se 100 persona brenda natës.
Lufta dy vjeçare e Izraelit në Gaza ka lënë të vrarë më shumë 72,000 persona, mbi 25,000 prej tyre vetëm gjatë vitit 2025, sipas të dhënave nga Ministria e Shëndetësisë së Gazës.
Enklava e shkatërruar nga lufta vazhdon të përballet me krizë humanitare, teksa më shumë se 90 për qind e territorit është shëndërruar në rrënoja./teve1.info/
