Një aksident tragjik ka tronditur rrugët e jugut në orët e para të kësaj të enjteje.
Një përplasje mes dy automjeteve në aksin rrugor Gjirokastër-Tepelenë u ka marrë jetën tre të rinjve, ndërsa një vajzë ndodhet në gjendje të rëndë.
Ngjarja e rëndë ka ndodhur rreth orës 03:18 të mëngjesit, në vendin e quajtur “Bypass”.
Sipas njoftimit zyrtar të policisë, dy automjete janë përplasur me forcë me njëra-tjetrën.
Mjeti që drejtohej nga shtetasi M. D., 25 vjeç, banues në Tepelenë, është përplasur me mjetin e drejtuar nga shtetasi K. M., 24 vjeç, po ashtu banues në Tepelenë.
Viktimat dhe e plagosura
Goditja ka qenë aq e fortë sa ka rezultuar fatale për dy drejtuesit e mjeteve dhe një pasagjer. Viktimat e këtij aksidenti janë:
M. D., 25 vjeç (Drejtuesi i mjetit)
K. M., 24 vjeç (Drejtuesi i mjetit)
A. R., 27 vjeç (Pasagjer, banues në Tepelenë)
Në gjendje të rëndë ka mbetur pasagjerja, shtetasja A. D., 19 vjeçe, banuese në Delvinë.
Ajo është transportuar me urgjencë drejt Spitalit të Traumës, ku ndodhet nën mbikëqyrjen e mjekëve.
Policia dhe grupi hetimor kanë qëndruar në vendngjarje deri në orët e para të dritës për të mbledhur prova që do të sqarojnë shkakun e kësaj përplasjeje tragjike.
“Rreth orës 03:18, në aksin rrugor “Gjirokastër-Tepelenë”, në vendin e quajtur “Bypass”, automjeti me drejtues shtetasin M. D., 25 vjeç, banues në Tepelenë është përplasur me automjetin që drejtohej nga shtetasi K. M., 24 vjeç, banues në Tepelenë. Si pasojë e aksidentit, kanë humbur jetën dy drejtuesit e automjeteve, pasagjeri shtetasi A. R., 27 vjeç, banues në Tepelenë, si dhe ka mbetur e dëmtuar shtetasja A. D., 19 vjeçe, banuese në Delvinë, e cila ndodhet në spitalin e Traumës, në kujdesin e mjekëve. Grupi hetimor vijon punën për sqarimin e plotë të rrethanave të aksidentit.”, njofton policia./rtsh.al/
