Ministri i Jashtëm i Rusisë, Sergei Lavrov , ka pohuar se Ukraina u përpoq të sulmonte rezidencën e Vladimir Putinit në rajonin e Novgorodit gjatë natës dhe për këtë arsye pozicioni negociues i Kremlinit tani do të ndryshojë, raportoi Interfax.
Ai tha se Ukraina sulmoi rezidencën shtetërore të presidentit rus me 91 dronë me rreze të gjatë veprimi, pa ofruar prova. “Veprime të tilla të pamatura nuk do të mbeten pa përgjigje”, citohet të ketë thënë Lavrov.
Ministri i jashtëm rus tha se pavarësisht sulmit të supozuar, Moska synon të vazhdojë procesin e negociatave për t’i dhënë fund luftës.
Presidenti ukrainas, Volodymyr Zelenskyy i ka hedhur poshtë akuzat si gënjeshtër, duke shtuar se Moska po përgatiste terrenin për të sulmuar ndërtesat qeveritare në Kiev, sipas agjencisë së lajmeve Reuters.
Zelenskyy i ka kërkuar SHBA-së të reagojë ndaj kërcënimeve ruse në përputhje me rrethanat dhe e ka cilësuar pretendimin rus si një mënyrë për të minuar përparimin në bisedimet e paqes pas takimit të udhëheqësit ukrainas me Donald Trump dje.
Pas akuzave, udhëheqësi ukrainas i ka paralajmëruar njerëzit e tij të jenë në gatishmëri për sulme të reja.
“Ata thjesht po përgatisin terrenin për të kryer sulme, ndoshta në kryeqytet dhe ndoshta në ndërtesat qeveritare”, u tha Zelenskyy gazetarëve, citon Guardian.
“Të gjithë duhet të jenë vigjilentë tani, absolutisht të gjithë. Një sulm ndaj kryeqytetit mund të kryhet, veçanërisht pasi ky person [Putin]… tha se do të zgjedhë objektivat përkatëse.”
