Kandidati për deputet nga Lëvizja Vetëvendosje, Mefail Bajqinovci, ka deklaruar se rezultati i zgjedhjeve me 50 për qind ka qenë i pritshëm, duke theksuar se qytetarët kanë vlerësuar punën e bërë nga LVV-ja si në nivel qendror ashtu edhe në atë lokal.
Sipas Bajqinovcit, LVV ka arritur rreth 50 për qind të votave në nivel vendi, duke u shndërruar kështu në partinë më të madhe në historinë e zgjedhjeve parlamentare në Kosovë.
“Rezultati ka qenë i pritshëm. Me punën e mirë që është bërë në nivel qendror dhe lokal, populli e ka vlerësuar këtë angazhim dhe kemi dalë me rreth 50 për qind të votave. Ky do të jetë rezultati më i madh në historinë e parlamentarizmit në zgjedhjet nacionale, me rreth gjysmë milioni vota në nivel vendi. Është një fitore historike, duke e tejkaluar edhe rezultatin e vitit 2021”, ka deklaruar Bajqinovci.
Ai ka shtuar se ky sukses është rezultat i një pune intensive të bërë nga Qeveria dhe Kuvendi, por edhe nga angazhimi i drejtpërdrejtë me qytetarët në të gjithë vendin.
“Për këtë rezultat kemi punuar intensivisht, cep më cep, shtëpi më shtëpi, lagje më lagje, qytet për qytet e fshat më fshat. Po ashtu kemi pasur një bashkëpunim të vazhdueshëm edhe me mërgatën, gjë që ka ndikuar drejtpërdrejt në këtë rezultat”, ka theksuar ai. /teve1.info/
