Kryetari i Partisë Demokratike të Kosovës, Bedri Hamza, pas përfundimit të procesit zgjedhor të së dielës dhe rezultateve preliminare, ka mbajtur sot një konferencë për media, ku ka folur hapur për rezultatin zgjedhor dhe hapat e ardhshëm të PDK-së.
Hamza ka thënë se ai dhe partia kanë pritur rezultat më të mirë dhe se PDK-së i nevojitet një rezultat tjetër.
“Kemi pritur rezultat më të mirë. Unë personalisht kam pritur rezultat më të mirë dhe PDK-së i nevojitet një rezultat tjetër,” është shprehur Hamza, duke theksuar se megjithatë PDK-ja ka arritur të ruajë votën dhe elektoratin e saj.
Hamza ka bërë të ditur se gjatë ditëve në vijim do të zhvillohen takime me strukturat e partisë për të analizuar dhe peshuar të gjitha opsionet, ndërsa vendimet do të merren në kohë dhe pa vonesa.
“Këto ditë do të kemi takime me strukturat e Partisë Demokratike të Kosovës. Vendimet do të merren në kohë, të analizuara dhe të peshuara mirë, dhe sigurisht nuk do të ketë vonesa në vendimmarrje”, ka thënë Hamza.
Ai gjithashtu ka theksuar rëndësinë e funksionimit të institucioneve dhe shmangies së çdo vakuumi institucional.
“Shpresoj që sa më parë të konstituohen institucionet. Vendi duhet të ketë institucione dhe të mos kemi më vakum institucional”, ka nënvizuar ai.
Hamza ka shtuar se puna duhet të vazhdojë pa vonesa dhe bllokada të reja.
“Mjaftueshëm kemi pasur vonesa dhe bllokada. Secili duhet ta bëjë punën e vet, edhe partitë që kanë fituar, edhe ne që mund të jemi në opozitë, ta japim kontributin tonë brenda përgjegjësive tona”, ka deklaruar Hamza.
Kreu i PDK-së ka bërë të ditur se partia do të japë kontributin e saj për çdo çështje që është në interes dhe në dobi të Kosovës.
“Gjithçka që është në interes të Kosovës, PDK do ta japë kontributin e vet, përfshirë edhe marrëveshjet ndërkombëtare,” përfundoi ai.
