Bordi i Federatës së Basketbollit të Kosovës, në mbledhjen e rregullt të mbajtur më 23 dhjetor 2025 në Prishtinë, ka miratuar Raportin e Punës për vitin 2025 dhe Raportin Financiar për periudhën janar–nëntor, si dhe ka aprovuar Planin e Veprimit, Planin Financiar dhe Planin e Marketingut & Shpërndarjes për vitin 2026.
Një nga vendimet kryesore ishte vazhdimi i mandatit të Sekretares së Përgjithshme, znj. Elvira Dushku, në përputhje me Statutin e FBK-së.
Në aspektin sportiv dhe strategjik, Bordi ka emëruar Bujar LociN përzgjedhës të Përfaqësueses A të Kosovës për ciklin e para-kualifikimeve të FIBA EuroBasket 2029, ndërsa ka miratuar edhe Planin Strategjik të FBK-së për periudhën 2026–2030, si dhe Planin Strategjik për zhvillimin e basketbollit 3×3, në funksion të përgatitjeve për Lojërat Mesdhetare Prishtina 2030.
Vendimet përfshijnë edhe ndryshime në Komisionin për Nominimin e Personave Zyrtarë të Ndeshjeve, masa për rritjen e mbrojtjes kontraktuale të basketbollistëve vendorë në bashkëpunim me FIBA-n dhe ekspertë ligjorë, si dhe miratimin e planit për zbatimin e rregullores që parasheh ndarjen e 10% të mjeteve për zhvillimin e gjeneratave të reja nga klubet e ProCredit Superligës, e cila hyn në fuqi nga janari 2026.
