Siguria është e lartë.
Tre të akuzuarit për organizimin e vrasjes dhe ekzekutimin e Liridona Ademaj, të hënën panë video të ditës kritike, 29 nëntorit 2023.
Prokuroria speciale prezantoi provat materiale, që tregojnë lëvizjet e Naim Murselit që nga mëngjesi i 29 nëntorit.
Ai ditën e nisi me një takim në një pikë derivatesh me Granit Plavën.
Naimi me Granitin u takuan sërish edhe njëherë në mbrëmje, në një tjetër pikë derivatesh.
“Ja Naim Murseli del dhe i afrohet, tani e shohim që Garanit Plava dhe i jep një pije energjike. Granit plava me siguri po i verifikon gomat dhe shihen së bashku shkojnë, largohen. Bisedojnë me siguri po e marrë me mend se po merren vesh se si ta përfundojnë punën”, tha Javorka Perlinçeviq – prokurore e rastit.
Para trupit gjykues u lëshuan edhe incizime nga kamerat e sigurisë së shtëpisë së Naim Murselit, ku shihet fillimisht që aty vjen Liridona Ademaj bashkë me fëmijë.
Në mbrëmje, aty vjen Naim Murseli dhe i merr për të shkuar në një restorant.
Gjatë gjithë kësaj kohe, përmes kamerave të sigurisë nga kompanitë përreth rrugës, shihet se pas tyre shkon me veturë Granit Plava.
Madje i njëjti, hyn dhe darkon në restorantin e njëjtë me ta, duke përdorur hyrje dhe tavolinë tjetër.
Në një moment të darkës, prokuroria veçon një pjesë ku Naim Murseli ngritet nga tavolina dhe i bie rrugës afër tavolinës së Granit Plavës, duke e sinjalizuar me duar.
Pas darkës, Naim Murseli me Liridona Ademaj dhe fëmijët me një veturë të tipit BMË largohen.
Menjëherë pas tyre, edhe Granit Plava me një veturë të tipit Seat, me të cilën është parë gjatë gjithë ditës.
Në seancë, u lëshua edhe një audio incizim ku dëgjohet krisma e armës dhe të qarat e fëmijëve.
Më pas, nga kamerat e një autobusi urban, u shfaqën pamje të vendit ku ndodhi vrasja.
“Askush nuk është në rrugë, as ta ndihmojë Liridonën e as ta rrezikojë Naimin”, u shpreh Perlinçeviq.
Asnjë nga provat nuk u kundërshtua nga mbrojtja, mirëpo disa komente për to pati mbrojtja e Murselit.
“Nuk vërehet se ka komunikuar me zë dhe nuk mund të nxjerrim pëfundime vetëm me lëvizje”, tha Shemsedin Piraj – avokat i Naim Murselit.
Gjithë këto pamje të natës kritike, nga afër i pa edhe vëllau i Liridona Ademaj, dhe për të ky nuk ishte një moment i lehtë.
“Sot për neve nuk ishte një ditë e lehtë pasi që i pamë edhe videot e fundit të jetesës së motrës tonë. Pra ajo çfarë pamë në video sot ishte që tre të akuzuarit e kanë planifikuar mirë, pasi që e gjithë ngjarja ka ndodhur vetëm për shtatë minuta, pra nuk ishte një vrasje e jo planifikuar por ishte e planifikuar mirë nga të tre të akuzuarit”, deklaroi Leonard Ademaj – vëllai i të ndjeres Liridona Ademaj.
Gjyqi ndaj Murselit, Plavës e Kokallës do të vazhdoj në muajin janar të vitit të ardhshëm.
