Këshilli i Bashkimit Evropian njoftoi të hënën se ka vendosur të zgjasë sanksionet ekonomike kundër Rusisë për gjashtë muaj të tjerë, duke u përgjigjur ndaj agresionit të vazhdueshëm të Moskës kundër Ukrainës.
“Masat do të mbeten në fuqi deri më 31 korrik 2026,” tha këshilli në njoftimin për shtyp, citon Guardian.
Sanksionet ekonomike, të vendosura për herë të parë në vitin 2014, janë zgjeruar ndjeshëm që nga shkurti i vitit 2022, si përgjigje ndaj “agresionit ushtarak të paprovokuar, të pajustifikuar dhe të paligjshëm të Rusisë kundër Ukrainës.”
Aktualisht, masat përfshijnë një gamë të gjerë kufizimesh sektoriale që mbulojnë tregtinë, financat, energjinë, teknologjinë dhe mallrat me përdorim të dyfishtë, si dhe industrinë, transportin dhe mallrat luksoze.
Sanksionet përfshijnë ndalimin e importit dhe transferimit të naftës ruse në BE, çaktivizimin e disa bankave ruse nga sistemi SËIFT, si dhe pezullimin e aktiviteteve dhe licencave të disa mediave të mbështetura nga Kremlini në Bashkimin Evropian.
Përveç kësaj, masa specifike i mundësojnë BE-së të kundërshtojë anashkalimin e sanksioneve.
“Këto masa janë të përshtatshme të mbahen në fuqi dhe të merren masa shtesë, nëse është e nevojshme, për sa kohë që veprimet e paligjshme të Federatës Ruse vazhdojnë të shkelin rregullat themelore të së drejtës ndërkombëtare, duke përfshirë, në veçanti, ndalimin e përdorimit të forcës,” thuhet në njoftim.
