Qeveria britanike ka shkurtuar për 40% ndihmën e huaj për kundërshtimin e agresionit dhe dezinformimit rus në Ballkanin Perëndimor, i cilësuar nga kryeministri Keir Starmer si jetik për sigurinë kombëtare të Mbretërisë së Bashkuar.
Financimi britanik i angazhuar për të forcuar Ballkanin Perëndimor, ku Rusia është akuzuar për mbjellje përçarjesh dhe destabilizim, është ulur nga 40 milionë funte vitin e kaluar në 24 milionë funte për periudhën 2025-26.
Fondi i Integruar i Sigurisë (ISF) është hartuar për të trajtuar kërcënimet me përparësi më të lartë ndaj sigurisë kombëtare të Mbretërisë së Bashkuar brenda dhe jashtë vendit.
Starmer e përshkroi së fundmi rajonin e Ballkanit Perëndimor, që përfshin Shqipërinë, Bosnjën dhe Hercegovinën , Kosovën, Malin e Zi, Maqedoninë e Veriut dhe Serbinë, si “kryqin e Evropës – vendin ku vihet në provë siguria e kontinentit tonë”.
Shuma e ndihmës zyrtare për zhvillim (ODA) e angazhuar për Ballkanin Perëndimor në kuadër të ISF-së është ulur nga 31.91 milionë paund në vitet 2024-25 në 17 milionë paund për vitet 2025-26, raporton gazeta britanike Guardian.
Viti financiar 2025-26 është i pari në një tranzicion gradual të njoftuar nga qeveria drejt uljes së ndihmës ekonomike (ODA) nga 0.5% në 0.3% të të ardhurave kombëtare bruto deri në vitin 2027.
