Me dy ndeshjet që do të luhen gjatë ditës së sotme, do të përfundojë edhe xhiro e 13-të në Superligën e Kosovës në basketboll.
Megjithatë, vëmendja do të jetë në qytetin e Pejës, saktësisht në palestrën “Karagaçi”, ku skuadra pejane do të përballet me Bashkimin.
Kjo ndeshje nis nga ora 17:00 dhe pritet një rivalitet i fortë mes të dyja skuadrave, që synojnë fitoren në këtë derbi.
Bashkimi dhe Peja, ndajnë pozitat dy dhe tre në tabelë me nga 20 pikë të mbledhura, ndërsa kanë shënuar fitore xhiron e shkuar për ta bërë këtë duel edhe më interesant.
Bashkimi i dha fund serisë prej katër humbjeve rresht me triumf ndaj Golden Eagle Yllit kurse Peja ishte bindshëm më e mirë sesa Sigal Prishtina.
Xhiro e 13-të, do të mbyllet me duelin ndërmjet Borës dhe Yllit, i cili luhet në palestrën “1 Tetori” në Prishtinë, me fillim nga ora 19:30.
Të dyja skuadrat në këtë përballje futen pas humbjeve që i pësuan xhiron e shkuar dhe tani janë në kërkim të fitores.
Ylli renditet i fundit në tabelë me 15 pikë, dy më pak se Bora që zë vendin e gjashtë në Superligë.
