Gazeta britanike The Guardian ka listuar 25 shtete të ndryshme evropiane të cilët shkrimtarët kanë vizituar dhe i kanë përshkruar si vende “emocionuese”, ndër to edhe Kosovën dhe Shqipërinë.
Gjatë verës shkrimtari Stuart Kenny vizitoi shtegun e ecjes Via Dinarica, e rihartuar së fundmi ku ai kaloi një javë të tërë në një kasolle të izoluar me pamje nga mali. Ai u shoqërua nga mbrëmjet me byrekë dhe raki.
Sipas tij, edhe pse librat e historisë ofrojnë kontekst të rëndësishëm për ecjen në Kosovë, ato “nuk të përgatisin për bukurinë e maleve”.
“Ecëm pranë luleve edelweiss në kreshtën kufitare me Malin e Zi; në njërën anë shkëmbore dhe e thepisur, e në anën tjetër e gjelbër e gjallë, që zbret drejt livadheve me lule të egra rozë dhe të verdha. Zogjtë e ndryshëm fluturonin rreth shkëmbinjve të lartë dhe qëndronin në degë më poshtë. Jeta e egër, e zhdukur në pjesë të mëdha të Evropës, ende lulëzon këtu (arinj, ujq, rrëqebuj) në një mozaik lisash dhe ahesh, boronicash dhe shkurresh, lugina të thella dhe pllaja të larta. Liqenet malore krijojnë vende notimi si nga ëndrra, nën majat e larta pranë Shqipërisë”, thuhet në artikull.
Në anën tjetër, shkrimtarja Holly Tuppen vizitoi shtetin fqinj të Kosovës, Shqipërinë, e cila i la “një përshtypje të thellë” asaj. Ajo qëndroi dy net në një bujtinë në Lëpushë, e rrethuar nga pemishte, koshere bletësh dhe ferma të vogla që veniten drejt Bjeshkëve të Nemuna. Sipas saj, ky fshat nuk është edhe aq i frekuentuar nga turistët.
“Mbërritëm në muzg dhe fëmijët (10 dhe 12 vjeç) luanin me kotele në verandën e kabinës sonë, ndërsa ne bisedonim me pronarin për jetën në Lëpushë. Migrimi jashtë vendit ose drejt qyteteve është një problem (shkolla lokale ka vetëm një nxënës), dhe turizmi është një shpëtim për ata që kanë mbetur. Fatmirësisht, Lëpushë ka shumë për të ofruar. Ditën e parë, u hodhëm nga shkëmbinjtë në një vend notimi me ujë blu të shkëlqyer dhe u ngopëm me djathë dhe bukë shtëpie në një stan bariu. Ditën e dytë, bëmë një ecje deri në majën e Nagvacit (2,412 metra) në shtigje pothuajse të shkreta, duke ngrënë boronica të egra gjatë rrugës. Pavarësisht gjithë kësaj, Lëpushë vizitohet nga shumë më pak turistë sesa Thethi dhe Vuthaj i afërt, sepse nuk është pjesë e itinerarit të njohur të ecjes “Peaks of the Balkans”, shkruan në artikull./KP/
