Xhudistët elitarë të Kosovës pritet shumë shpejt të shfrytëzojnë kapacitetet e plota të Qendrës Nacionale në Pejë.
Përmes dy njoftimeve nga Ministria për Kuturë Rini dhe Sport dhe Federatëa së Xhudos së Kosovës, u bë e ditur se të premten kanë nisur punimet në ndërtimin e Qendrës Nacionale të Xhudos në Pejë.
Projekti madhor kushton 5,8 milionë euro, sipas MKRS-së, dhe aktualisht Qendra Nacionale e Xhudos vetëm do të plotësohet me objekte përcjellëse.
Tashmë salla e xhudos, e njohur si Qendra Nacionale e Xhudos, është funksionale.
“Xhudistët tanë medalistë olimpikë e meritojnë më të mirën, prandaj po krijojmë kushte të plota për ta. Ky projekt është edhe një falënderim i yni për Dritonin, Majlindën, Agronin dhe për të gjithë ata që e kanë lartësuar shtetin me punën dhe sukseset e tyre. Qendra do të përfshijë sallën sportive, hapësira moderne për fitnes, pishinë për rigjenerim dhe trajnim, akomodim për sportistët dhe stafin, hapësira për kujdes mjekësor dhe të gjitha hapësirat teknike të nevojshme për ngjarje dhe funksionim të përditshëm”, ka shkruar ministri në detyrë për Kulturë, Rini dhe Sport, Hajrulla Çeku.
Edhe përzgjedhësi i Kosovës në xhudo, Driton Kuka, ka shkruar se punimet kanë nisur për
Projektin më madhir të xhudos në vend.
“Aty ku u ndërtuan pesë medaljet olimpike, prej tyre tri të arta, do të bëhet një qendër moderne për sportin e xhudos. E gëzofshim me shumë medalje e suksese të reja”, ka shkruar Kuka.
Kompleksi, ndër të tjera, do të përmbajë palestrën sportive, sallën, zhveshtoret dhe tualetet, një tribunë për 700 shikues, hapësirën e duhur për media, 52 dhoma për akomodim dhe bujtina shtesë, objektin me pishina dhe salla fitnesi.
Në këtë kompleks planifikohet të mbahen garat e xhudos në Lojërat Mesdhetare që mbahen në Kosovë në vitin 2030.
Xhudistët e Kosovës ka kohë që shquhen për suksese kulmore ndërkombëtare. Në xhudo Kosova i ka tri medalje të arta olimpike dhe pesë medalje olimpike në total.
Me hapjen e Qendrës Nacionale të Xhudos organizimi i këtij sporti në vend ka kaluar në nivel më të lartë. Me kompletimin e kësaj qendre Kosova do të bëhet destinacion i rëndësishëm i xhudos në Evropë.
