Kryetari i Junikut, Ruzhdi Shehu, ka dhënë sot betimin për mandatin e dytë në krye të kësaj komune.
Ceremonia u mbajt në sallën e Kuvendit Komunal, në praninë e një numri të madh të ftuarish, përfaqësues institucionalë dhe qytetarë të Junikut.
Gjatë ceremonisë, krahas kryetarit, betimin e dhanë edhe anëtarët e rinj të Asamblesë Komunale, të cilët zyrtarizuan mandatin e tyre si përfaqësues të Kuvendit Komunal të Junikut.
Në fjalimin e tij, kryetari Shehu theksoi përkushtimin ndaj qytetarëve dhe zhvillimit të komunës, ai u zotua se do të vazhdojë të udhëheq me nder, transparencë dhe llogaridhënie, në shërbim të interesit të qytetarëve.
“Do të vazhdojmë të punojmë me përkushtim për Junikun, duke ruajtur vlerat tona dhe duke sjellë zhvillim të qëndrueshëm për të gjithë qytetarët”, tha ndër të tjera kryetari Shehu.
Mbledhja solemne përfundoi me një koktej rasti, në një atmosferë festive për komunën e Junikut.
