Kandidati i AAK-së për deputet për zgjedhjet e 28 dhjetorit, Besnik Krasniqi duke folur për dështimin e partive ish – opozitare për formimin e qeverisë, ka thënë se nuk gjetën një mirëkuptim nga PDK e LDK.
Krasniqi ka thënë se AAK ka qenë promotor e një qeverie nga opozita.
Ai në emisionin “Këndi i Debatit” në Tëvë1, ka thënë se për ta ka qenë befasues qëndrimi i kreut të Lidhjes Demokratike, Lumir Abdixhiku.
“AAK dhe Haradinaj kanë qenë vazhdimisht promotor, që opozita me krijuar qeverinë, por fatkeqësisht nuk ke hasur në mirëkuptim të PDK-së dhe LDK-së. Kemi pritur shumë nga LDK dhe Abdixhiku që do të reflektojë”, tha ai.
Hezitimi i Abdixhikut sipas tij, ka një arsye.
“Edhe sot nuk mundem me kuptua, kam pyet edhe kolege të LDK-së dhe askush nuk është i qartë pse është tërheq z.Abdixhiku. Unë mendoj që ka të bëjë me presidenten e vendit ose lidhja e tij miqësore i ka shërbyer për me shty këtë proces”, tha anëtari i AAK-së.
Krasniqi ka thënë se formimin e qeverisë nga opozita e dëmtoi dhe lëvizja e “hershme” e kreut të Nismës, Fatmir Limaj.
“Lëvizja e hershme dhe deklaratat e z.Limaj e kanë dëmtuar procesin e krijimin të bllokut opozitar që të behet qeveria prej opozitës”, ka thënë ai.
