Kandidati fitues për t’u bërë deputet në Kosovë shpenzon mesatarisht 12,150 euro, thuhet në raportin “Kostoja e politikës në Kosovë”, publikuar nga Democracy Plus (D+) dhe Westminster Foundation for Democracy (WFD).
Studimi analizon shpenzimet e kandidatëve në zgjedhjet nacionale të vitit 2025 dhe ndikimin e tyre në konkurrencën politike dhe integritetin zgjedhor.
Sipas raportit, shpenzimet mesatare për një kandidat janë 9,463 euro, ndërsa kandidatët e pazgjedhur shpenzojnë shumë më pak – rreth 4,090 euro.
Gratë kandidate rezultuan të kenë shpenzuar më shumë se burrat: 15 mijë euro krahasuar me 6 mijë euro të meshkujve.
Graeme Ramshaw nga WFD theksoi se fushatat po bëhen gjithnjë e më të shtrenjta, duke theksuar se kandidatët varen kryesisht nga financimi personal, ndërsa gratë shpesh detyrohen të marrin hua nga të afërmit.
Albert Krasniqi nga D+ shpjegoi se hulumtimi u bazua në intervista me kandidatë e deputetë, si dhe fokus-grupe me ekspertë të shoqërisë civile.
Raporti tregon se rekrutimi në parti shpesh varet nga popullariteti, financat personale dhe afërsia me liderin, më shumë sesa nga aktivizmi afatgjatë.
Studimi gjithashtu konstaton se lidhja mes shpenzimeve dhe suksesit elektoral është e qartë: ata që shpenzojnë më pak se 2,500 euro rrallë fitojnë, ndërsa kandidatët që investojnë mbi 8,000 euro kanë gjasa shumë më të larta për të siguruar ulëse në Kuvend.
