Te Drita kanë pranuar se e kanë parasysh se AZ Alkmaari është një kundërshtar i fortë, por kanë shtuar se janë plotësisht gati për këtë përballje të vështirë.
Synimi i Dritës është fitorja ndaj ekipit të njohur nga Holanda, por te kampionia në fuqi e Kosovës, do të kënaqeshin edhe me një barazim.
Ndeshja ndërmjet Dritës dhe Az Alkmaarit, luhet sot prej orës 18:45 në stadiumin “Fadil Vokrri” në Prishtinë, ndërsa i takon xhiros së pestë të fazës së ligës në Ligën e Konferencës.
Drita ende nuk di për humbje në Ligën e Konferencës dhe është e teta në tabelë me tetë pikë të mbledhura, dy më shumë se AZ Alkmaari që renditet i 20-ti.
Skuadra nga Gjilani pret edhe ndihmën e tifozëve për të marrë një rezultat pozitiv ndaj AZ Alkmaarit, ndonëse trajneri Zekirija Ramadani ka insistuar se skuadra e tij nuk ka nevojë për motivim pasi e di synimin e saj.
Drita në këtë ndeshje nuk do ta ketë kapitenin Rron Broja, i cili do të mungojë për shkak të lëndimit.
Sot, në orarin e njëjtë luan edhe Shkëndija e Tetovës, që në Shkup përballen me Sllovan Bratisllavën.
